"Until the lions have their own historians the history of the hunt will always glorify the hunter...."
- Chinua Achebe

2018, ഏപ്രിൽ 30, തിങ്കളാഴ്‌ച

യുക്തിചിന്ത യൂറോപ്പിലും, അമേരിക്കയിലും - ഐ ശാന്തകുമാര്‍



മതം മനുഷ്യനെ മയക്കുന്ന കറുപ്പാണെന്ന മാര്‍ക്‌സിയന്‍ ചിന്തയ്ക്ക് നൂറ്റാണ്ടിന്റെ പഴക്കമുണ്ട്. ഈ കറുപ്പ് ഇന്ന് മനുഷ്യരാശിയുടെ ശാപമായി മാറിക്കഴിഞ്ഞിരിക്കുകയാണ്. 245-ല്‍ പരം രാഷ്ട്രങ്ങള്‍ ഇന്ന് ലോകത്തിലുണ്ട്. സംഘടിതമതങ്ങളായ ക്രിസ്തു മതം 33 ശതമാനം പേരെ യും ഇസ്ലാം മതം 23 ശതമാനം പേരെയും വീതിച്ചെടുത്തിട്ടുണ്ട്. സമാധാനം, ശാന്തി, കാരുണ്യം, എന്നൊ ക്കെ രാപകലോളം വിളിച്ചു കൂവി ക്കൊണ്ടിരിക്കുന്ന മതങ്ങള്‍ അവരുടെ മനുഷ്യക്കുരുതികളെ ന്യായീകരിക്കാനും തങ്ങളുടെ സംഘടിതശക്തിയുടെ പിന്‍ബലം ഉപയോഗിക്കുന്നു; തങ്ങള്‍ മാത്രമാണ് ശരിയെന്നു സ്ഥാപിക്കാന്‍ അവര്‍ വൃഥാ അധ്വാനിക്കുന്നു! തങ്ങളുടെ ഭീകരതയെന്യായീകരിക്കാന്‍ അവര്‍ മറ്റൊരു മതത്തിന്റെ ഭീകരതയെ ആയുധമാക്കുന്നു. പലപ്പോഴും സംഘടിത മതങ്ങളാണ് ഈ മനുഷ്യക്കുരുതികള്‍ നടത്തിവരുന്നത്. മതങ്ങളുടെ ആധിപത്യം നിലനിര്‍ത്തുകയാണ് അവരുടെ ആവശ്യം. സര്‍വമത സമ്മേളനങ്ങള്‍ എന്ന അമ്പലപ്പറമ്പ് നാടകത്തിന്റെ പ്രധാന കഥ മനസ്സിലാക്കുന്നതില്‍ ജനം പരാജയപ്പെട്ട ചരിത്രമാണ് നമ്മുടെ നാടിന്റേത്. ലോക സമാധാനത്തിന് മതം അത്യന്താപേക്ഷിതമല്ല എന്നുമാത്രമല്ല തീരെ അനാവശ്യവുമാണ് എന്ന നിഗമനത്തിന് ഉപോദ്ബലമാകുന്ന എട്ട് രാഷ്ട്രങ്ങളുടെ ഉദാഹരണം ഇപ്പോള്‍ നമ്മുടെ മുന്നിലുണ്ട്.

1. ചെക്ക് റിപ്പബ്ലിക്ക്

കമ്യൂണിസത്തിന് സംഭവിച്ച പതനത്തെ തുടര്‍ന്ന് പല മുന്‍കമ്യൂണിസ്റ്റ് രാഷ്ട്രങ്ങളിലെയും ജനങ്ങള്‍, ഒരുകാലത്ത് അവര്‍ക്ക് വിലക്കപ്പെട്ടിരുന്നതും സ്വയം വിലക്കിയിരുന്നതുമായ മതവിശ്വാസങ്ങളിലേക്ക് മടങ്ങിക്കൊണ്ടിരിക്കുന്ന ദയനീയ കാഴ്ച കാണാം. എന്നാല്‍ ചെക്ക് റിപ്പബ്ലിക്കിന്റെ സ്ഥിതി അതല്ല. ഇരുപത്തിയൊന്ന് ശതമാനം ജനങ്ങളുടെ ദൈനംദിന ജീവിതത്തില്‍ മാത്രമാണവിടെ മതത്തിന് നിര്‍ണായക സ്വാധീനമുള്ളത്. മറ്റു കിഴക്കന്‍ യൂറോപ്യന്‍ രാജ്യങ്ങളില്‍ നിന്നും ഭിന്നമായി, ചെക്ക് റിപ്പബ്ലിക് ഐക്യരാഷ്ട്രസഭയിലെ ഹ്യൂമന്‍ ഡവലപ്‌മെന്റ് റിപ്പോര്‍ട്ടില്‍ പ്രമുഖസ്ഥാനം നേടിയിരിക്കുന്നു. ഒരു സമത്വാധിഷ്ഠിത സമ്പദ്‌വ്യവസ്ഥയെ അടിസ്ഥാനപ്പെടുത്തിക്കൊണ്ടുള്ളതും ഉന്നത നിലവാരത്തിലുള്ളതുമായ ഒരു നിരീശ്വരവാദ പ്രസ്ഥാനത്തെക്കുറിച്ചുള്ള അടയാളങ്ങളുടെ കൂമ്പാരം തന്നെ അവിടെ ദൃശ്യമാണിപ്പോഴും. റഷ്യയെപ്പോലുള്ള മറ്റ് മുന്‍ കമ്യൂണിസ്റ്റ് രാഷ്ട്രങ്ങളിലാവട്ടെ, അവരില്‍ പുതുതായി ഉടലെടുത്ത മതത്തോടുള്ള ബാന്ധവം മൂലം ജനങ്ങള്‍ ദൈനംദിന പ്രശ്‌നങ്ങള്‍ക്ക് ഓരോന്നിനും ദൈവീകമായ പരിഹാരം തേടിയലയുകയാണ്. 

2,3, സ്വീഡനും ഡെന്‍മാര്‍ക്കും

ഈ രാജ്യങ്ങളിലെ വലിയൊരു ശതമാനം ആളുകള്‍ യുക്തിവാദത്തിലേക്ക് ആകൃഷ്ടരായിക്കൊണ്ടിരിക്കുകയാണ് ഇന്ന്. യുക്തിവാദത്തിലൂടെ സാഹോദര്യവും സൗഹാര്‍ദ്ദവും ഊട്ടിയുറപ്പിക്കാനാവുമെന്ന് അനുഭവത്തിലൂടെ തിരിച്ചറിഞ്ഞു കഴിഞ്ഞ രാഷ്ട്രസമൂഹങ്ങളാണ് അവ. ക്രമമായി കേവലം പതിനേഴ്, പതിനെട്ട് ശതമാനം ജനങ്ങള്‍ മാത്രമേ ഈ രാജ്യങ്ങളില്‍ മതങ്ങളുടെ മതില്‍ക്കെട്ടുകള്‍ക്കുള്ളില്‍ തങ്ങളുടെ ലോകം തളച്ചിടാന്‍ സ്വയം അനുവദിക്കുന്നുള്ളൂ. പൊതുവായി നോക്കുമ്പോള്‍ ചടങ്ങെന്ന നിലയില്‍ക്കവിഞ്ഞ പ്രാധാന്യം മതത്തിന് ഈ രാജ്യങ്ങളിലില്ല എന്നു തന്നെ പറയാം. വീട്ടില്‍ ക്രിസ്തുമസ് ട്രീ വയ്ക്കാറുണ്ടെങ്കിലും 'കന്യാഗര്‍ഭ'ത്തിന്റെ വിശ്വാസഭാരത്തെ അവര്‍ ചുമക്കാറില്ല. വീട്ടിനകത്തോ പുറത്തോ ഈ രാജ്യങ്ങളിലെ ജനങ്ങള്‍ക്ക് മതത്തോടുള്ള അഭിനിവേശം തണുപ്പുരാജ്യക്കാരായ അവര്‍ മൂടിപ്പുതയ്ക്കുന്ന ഒരു പുതപ്പിനപ്പുറം ഒന്നുമല്ല! 

4. ആസ്ട്രിയ

മതവിശ്വാസത്തിന്റെ പേരില്‍ സര്‍ക്കാരിന്റെ പ്രത്യേക ആനുകൂല്യങ്ങള്‍ക്കൊന്നിനും അര്‍ഹരല്ല ആസ്ട്രിയയിലെ ജനങ്ങള്‍. മതവിശ്വാസികള്‍ക്കും മതനിരപേക്ഷര്‍ക്കും ഒരേ നിയമം, ഒരേ ആനുകൂല്യം. അടുത്ത കാലത്തായി അവിടെ, നെറ്റിയില്‍ മതചിഹ്നമുള്ള ഫോട്ടോ തന്റെ ഡ്രൈവിംഗ് ലൈസന്‍സില്‍ പതിപ്പിക്കാനുള്ള ഒരു ക്രിസ്തുമത വിശ്വാസിയുടെ അഭ്യര്‍ത്ഥനയ്ക്ക് പോലീസിന്റെ അനുമതി ലഭിച്ചിട്ടും ഗവണ്‍മെന്റിന്റെ അനുമതി നിഷേധിക്കപ്പെടുകയാണുണ്ടായത്. ശ്രദ്ധേയമായിരുന്നു അതു സംബന്ധിച്ചുള്ള ഗവണ്‍മെന്റിന്റെ അഭിപ്രായം. 'ഒരു മതവിശ്വാസിയുടെ ആത്മാര്‍ത്ഥതയും ആധികാരികതയും മികച്ചതായിരിക്കുമ്പോള്‍ തന്നെ, മറ്റൊരു വിശ്വാസ സംഹിതയില്‍ വിശ്വാസമര്‍പ്പിച്ചിരിക്കുന്ന ഒരാളുടെ ആത്മാര്‍ത്ഥതയും ആധികാരികതയും അതുപോലെ മികച്ചതായി കാണപ്പെടുന്നുവെങ്കില്‍, എങ്ങനെയാണ് പ്രത്യേക പരിഗണന മതവിശ്വാസിക്ക് നല്‍കാനാവുക?''

5. ഫ്രാന്‍സ്

മതപരമായി കത്തോലിക്കാ പാരമ്പര്യവും സംസ്‌കാരവും നിലനിര്‍ത്തുമ്പോള്‍ത്തന്നെ മതനിരപേക്ഷതയ്ക്ക് ഉന്നതമായ ദേശീയമൂല്യം കല്‍പ്പിക്കുന്നവരാണ് ഫ്രാന്‍സിലെ ജനത. അമേരിക്കയെപ്പോലെ തന്നെ രാഷ്ട്രവും പള്ളിയും തമ്മില്‍ വേര്‍തിരിക്കപ്പെട്ടിട്ടുള്ള ആധുനിക ജനാധിപത്യരാജ്യമാണ് ഫ്രാന്‍സ്. 1905-ല്‍ പാസ്സാക്കപ്പെട്ട ശക്തമായ നിയമത്തിലൂടെ അവിടെ പള്ളിയും രാഷ്ട്രവും തമ്മില്‍ വേര്‍തിരിക്കപ്പെടുകയും മതനിരപേക്ഷതയ്ക്ക് ശക്തമായ സംരക്ഷണം സംജാതമാവുകയും ചെയ്തു. ഈ മതനിരപേക്ഷമൂല്യബോധമാണ് പര്‍ദ്ദ ധരിക്കുന്നതിനെതിരെ നിയമം പാസ്സാക്കാന്‍ ഫ്രാന്‍സിനെ പ്രേരിപ്പിച്ചത്.

മതം വ്യക്തിപരമാണ്, അതിന്റെ സ്ഥാനം വീട്ടിനകത്താണ്. അത് പുറത്താകുമ്പോള്‍ പൊതുകാര്യമായിത്തീരുന്നു, അത് മറ്റുള്ളവരുടെ സ്വാതന്ത്ര്യത്തെ ഹനിക്കാനിടയാക്കിയേക്കും. അതായിരുന്നു ഫ്രാന്‍സിന്റെ നിലപാട്. ദൈനംദിന ജീവിതത്തില്‍ മതത്തിന്റെ ശിരോവസ്ത്രങ്ങള്‍ക്കുള്ളില്‍ വീര്‍പ്പുമുട്ടി ജീവിക്കാന്‍ തയ്യാറുള്ളവര്‍ അവിടെ ഇരുപത്തഞ്ച് ശതമാനം പേര്‍ മാത്രമാണ്! മാത്രവുമല്ല, മതപരിവര്‍ത്തനത്തെ നിയമം മൂലം നിരോധിച്ചിട്ടുമുണ്ട്. 

6. നോര്‍വെ

ലോകത്തില്‍ ഏറ്റവും സന്തോഷസമൃദ്ധി കാണുന്നതും മതപ്രസരം ഏറ്റവും കുറഞ്ഞതുമായ രാജ്യമാണ് നോര്‍വെ. സ്വീഡനും ഡെന്‍മാര്‍ക്കും ഈ രംഗത്ത് നോര്‍വെയുടെ പുറകിലാണ്. മതത്തിന് നിത്യജീവിതത്തില്‍ വലിയ സ്ഥാനമില്ലാത്ത രാജ്യങ്ങളില്‍ മുന്‍നിരയിലാണ് നോര്‍വെ. യുക്തിവാദം ഇവിടെ ശക്തിപ്രാപിക്കുകയുമാണ്. സാമ്പത്തിക ആനുകൂല്യങ്ങളും സാമൂഹികബാധ്യതകളും ഉറപ്പുവരുത്താനും നിറവേറ്റാനും ആ രാഷ്ട്രം യുക്തിവാദം പ്രയോജനപ്പെടുത്തുന്നു. ആ രാജ്യത്തെ സാമൂഹികബന്ധങ്ങള്‍ മതനിരപേക്ഷ മൂല്യങ്ങളില്‍ അടിസ്ഥാനപ്പെട്ടിരിക്കുന്നു. ലൂഥറന്‍ സഭയെ ഒഴിവാക്കിക്കൊണ്ടും സാംസ്‌കാരിക മൂല്യങ്ങളെ ഉയര്‍ത്തിപ്പിടിച്ചുകൊണ്ടുമാണ് ഇത് സാധ്യമാക്കിയിരിക്കുന്നത്. ഈ തീരുമാനം പാര്‍ലമെന്റില്‍ പോലും എതിര്‍ക്കപ്പെട്ടില്ല! പള്ളിപോലും അതിനെ പിന്താങ്ങുകയാണുണ്ടായത്. നിരീശ്വരവാദ പ്രസ്ഥാനവും പള്ളിയും കൈകോര്‍ത്ത് പ്രവര്‍ത്തിക്കുന്ന ഒരു അത്യുഗ്രന്‍ പ്രകടനത്തിലൂടെയാണ് അവിടെ ഒരു മതനിരപേക്ഷ രാഷ്ട്രം നിലകൊള്ളുന്നത്. എല്ലാ വിഭാഗം ജനങ്ങളുടെ ക്ഷേമൈശ്വര്യങ്ങളും മുന്‍നിര്‍ത്തിയുള്ളതാണ് അവരുടെ ഭരണവ്യവസ്ഥ.

7. ആസ്‌ട്രേലിയ

വോട്ടര്‍മാര്‍ ഒരു നിരീശ്വരവാദിയെ പിന്താങ്ങുകയില്ലെന്ന രാഷ്ട്രീയക്കാരുടെ വിശ്വാസത്തിന് വളരെ പഴക്കമുണ്ട്, വളരെ ദൃഢതയുമുണ്ട്. എന്നാല്‍ 2010-ലെ പൊതുതെരഞ്ഞെടുപ്പില്‍ ജൂലിയാ ഗില്ലാര്‍ഡ് എന്ന നിരീശ്വരവാദിയായ പ്രധാനമന്ത്രിയിലൂടെ ആ വിശ്വാസം തിരുത്തിക്കുറിക്കപ്പെട്ടു. തനിക്കു ദൈവവിശ്വാസമില്ല എന്നു വ്യക്തമാക്കുക മാത്രമല്ല ജൂലിയാ ഗില്ലാര്‍ഡ് ചെയ്തത്, താന്‍ ഒരു യുക്തിവാദിയാണെന്ന് കൂടി പ്രഖ്യാപിച്ചുകൊണ്ടാണ് ഇലക്ഷനെ നേരിട്ടതും പ്രധാനമന്ത്രിക്കസേരയില്‍ ഉപവിഷ്ടയായതും. (ഇന്ത്യയിലാണെങ്കില്‍ യുക്തിവാദിയെന്ന് സ്വയം പ്രഖ്യാപിക്കുന്ന ഒരാളുടെ സ്ഥിതിയെന്താകും, ഇന്നത്തെ ചുറ്റുപാടില്‍?) താന്‍ ഒരു ഈശ്വരവിശ്വാസിയല്ലെന്ന് തുറന്നു പറഞ്ഞ നിശ്ചയദാര്‍ഢ്യത്തിന് ആ ജനത നല്‍കിയ അംഗീകാരം കൂടിയായിരുന്നു ഗില്ലാര്‍ഡിന്റെ വിജയം. ഒരു യുക്തിവാദിയാകാനുള്ള ഏറ്റവും സുന്ദരവും സുരക്ഷിതവുമായ രാജ്യമാണിന്ന് ആസ്‌ട്രേലിയ. (A pretty safe country to be an atheist)

8. ജപ്പാന്‍

മറ്റു കിഴക്കനേഷ്യന്‍ രാജ്യങ്ങളെപ്പോലെ തന്നെ ജപ്പാനിലും മതം വിശ്വാസത്തിലുപരി പാരമ്പര്യമാണ്. ഇരുപത്തിയഞ്ച് ശതമാനം ജനങ്ങള്‍ക്കു മാത്രമാണ് ദൈനംദിന ജീവിതത്തില്‍ മതം നിര്‍ണായക സ്വാധീനമായിട്ടുള്ളത്. മുപ്പത്തിയൊന്ന് ശതമാനം ജനങ്ങള്‍ ദൈവമില്ല എന്ന വിശ്വാസക്കാരാണ്. ജപ്പാനിലെ നിരീശ്വരവാദ പ്രസ്ഥാനത്തിന് ഭരണകാര്യങ്ങളില്‍ സ്വാധീനമില്ലെങ്കിലും മതതല്‍പരത കൂടാതെയുള്ള ജീവിതത്തിന് ഒട്ടും സ്വീകാര്യതക്കുറവുമില്ല. മതസഹിഷ്ണുതയില്‍ അധിഷ്ഠിതമായ സംസ്‌ക്കാരമാണ് ജപ്പാനിലുള്ളത്; പല മതങ്ങള്‍ അവിടെ വേരോടിയിട്ടുണ്ടെങ്കിലും.

മതങ്ങളുടെ സംഹാരതാണ്ഡവമാണല്ലോ നാം കണ്ടുകൊണ്ടിരിക്കുന്നത്, ചുറ്റിലും. നിരപരാധികളെ കഴുത്തറുത്തും തോക്കിനിരയാക്കിയും ബോംബ് വര്‍ഷിച്ചും കൊന്നുകൂട്ടുന്ന മതഭ്രാന്തന്‍മാര്‍ക്ക് മുന്നില്‍ വത്തിക്കാനും മെക്കയും ഐക്യരാഷ്ട്രസഭയും രാഷ്ട്രത്തലവന്മാരും പഞ്ചപുച്ഛമടക്കുന്നു. ദര്‍ശനങ്ങളുടെയും ചിന്തകളുടെയും സംസ്‌കാരത്തിന്റെയും, എന്തിന് മതങ്ങളുടെയും കളിത്തൊട്ടിലായ മദ്ധ്യേഷ്യയും മധ്യധരണിക്കടലും രക്തപങ്കിലമായിക്കൊണ്ടിരിക്കുന്നു. മതം ഇതിനൊന്നിനും പരിഹാരമാവുന്നില്ല എന്ന ആഗോള യാഥാര്‍ത്ഥ്യത്തെ ഊട്ടിയുറപ്പിക്കുന്നതാണ് ഈ എട്ടു രാഷ്ട്രങ്ങളിലെയും രാഷ്ട്രീയവും സാമൂഹികവും സാമ്പത്തികവും മതപരവും ആയ ഇന്നത്തെ അവസ്ഥകള്‍. ഈ രാജ്യങ്ങളിലൊന്നും തന്നെ മതതീവ്രതയുടെ സ്ഫുരണങ്ങള്‍ പോലും കാണുക അസാധ്യം. എന്നാലോ, സന്തോഷ സമാധാനങ്ങള്‍ക്കാകട്ടെ യാതൊരു കുറവുമില്ല. സാഹോദര്യവും സമാധാനവും ലക്ഷ്യമാക്കുന്ന ഏതൊരു രാഷ്ട്രവും യുക്തിദര്‍ശനമെന്ന അടിത്തറയിന്മേലാണ് കെട്ടിയുയര്‍ത്തപ്പെടേണ്ടത് എന്ന സത്യത്തിന് അടിവരയിടാം, ഇപ്പോഴെങ്കിലും.
(യുക്തിരേഖ 2015 മെയ്)



2018, ഏപ്രിൽ 28, ശനിയാഴ്‌ച

എത്യോപ്യയില്‍ എത്തിയപ്പോള്‍ - മധുനായര്‍ ന്യൂയോര്‍ക്ക്


ഗാംഭീര്യമുണ്ട് ഇതിലെ നര്‍മ്മോക്തികള്‍ക്ക്. സഞ്ചാരസാഹിത്യത്തിലെ ഇതിഹാസകാരനായ സാക്ഷാല്‍ എസ് കെ പൊറ്റക്കാടിനെ വെല്ലുന്നുണ്ട് പദപ്രയോഗം. എന്നാല്‍ ആ നര്‍മ്മോക്തികള്‍ക്ക് വികെഎന്‍ പ്രയോഗങ്ങളോടാണ് കടപ്പാട് എന്ന് സൂചനയുണ്ട്താനും. ഹാസസാഹിത്യകൃതി എന്ന നിലയില്‍ പരിഗണിച്ചാല്‍ ഇത് വേളൂര്‍ കൃഷ്ണന്‍കുട്ടിയോട് കിടപിടിക്കും. ഘനഗാംഭീര്യവും അയത്‌നലാളിത്യവും ഒരേപോലെ പദസഞ്ചയത്തില്‍ സന്നിവേശിപ്പിട്ടുള്ള ഈ കൃതി എത്യോപ്യുടെ ചരിത്രവും വര്‍ത്തമാനവും വായനക്കാരനെ നേരിട്ട് അനുഭവിപ്പിക്കുന്നു. മറ്റുകൃതികള്‍.... ഇസ്രായേല്‍ ദൈവങ്ങള്‍ രാപാര്‍ക്കുന്നിടം, ഉണരുന്ന ആഫ്രിക്ക - ടാന്‍സാനിയ, വിയറ്റ്‌നാം കാഴ്ചകള്‍, ക്യൂബന്‍ ഡയറി എന്നിവയാണ്....

2018, ഏപ്രിൽ 27, വെള്ളിയാഴ്‌ച

ചൊവ്വ, മംഗള്‍യാന്‍, അന്ധവിശ്വാസം - ഐ ശാന്തകുമാര്‍



2013 നവംബര്‍ 5-ാം തീയതി ഇന്ത്യ, ഗോളാന്തര യാത്രയില്‍ ചരിത്രം സൃഷ്ടിച്ചുകൊണ്ട് മംഗള്‍യാന്‍ എന്ന പേടകത്തെ ചൊവ്വയിലേക്ക് പായിച്ചു. 450 കോടി രൂപ മുടക്കി 15 മാസം കൊണ്ടാണ് മംഗള്‍ യാന്‍ പദ്ധതി പൂര്‍ത്തീകരിച്ച് വിക്ഷേപണം നടത്തിയത്. ഏതാണ്ട് 40 കോടി കിലോമീറ്റര്‍ സഞ്ചരിച്ച് 300 ദിവസം കൊണ്ട് ഇന്ത്യന്‍ നിര്‍മ്മിതമായ മംഗള്‍യാന്‍ ചൊവ്വയുടെ ഭ്രമണപഥത്തിലെത്തി. 377 കിലോമീറ്റര്‍ ഉയരത്തില്‍ ചൊവ്വയെ ഭ്രമണം ചെയ്ത് മീഥെയ്ന്‍ ഉണ്ടോയെന്ന് പരിശോധിക്കലാണ് മുഖ്യലക്ഷ്യം. ഉണ്ടെന്ന് തെളിഞ്ഞാല്‍ ജീവന്‍ നിലനില്‍ക്കുന്നതിന് വേണ്ട കാലാവസ്ഥ ചൊവ്വയിലുണ്ടെന്ന് സമര്‍ത്ഥിക്കാം. രണ്ടാമത്തെ ലക്ഷ്യം ചൊവ്വയില്‍ ധാതുലവണങ്ങള്‍ ലഭ്യമാണോ എന്ന അന്വേഷണം. അതനുസരിച്ചുള്ള ഒരു മാപ്പു Map കൂടെ തയ്യാറാക്കലാണ് അടുത്ത ലക്ഷ്യം.

ചൊവ്വ ഒരു പാപ ഗ്രഹമാണ്; യുദ്ധത്തിന്റെ ദേവനാണ്, മനുഷ്യനെ ഉപദ്രവിക്കുന്ന ഗ്രഹമാണ്. ചൊവ്വാദോഷം ചുമത്തി വിവാഹങ്ങള്‍ പോലും വഴിമുടക്കുന്നു. ഇതൊക്കെ ഇന്ത്യന്‍ ചൊവ്വാദോഷങ്ങള്‍. നമ്മുടെ സൗരയൂഥത്തിലെ ഭൂമി കഴിഞ്ഞാല്‍ അല്പമെങ്കിലും ജീവിക്കാന്‍ സൗകര്യമുള്ള ഗ്രഹം. സൗരയൂഥത്തിലെ രണ്ടാമത്തെ ചെറുഗ്രഹം. Iron Oxide-ന്റെ സാന്നിദ്ധ്യം കൊണ്ട് ചുവപ്പു നിറം പേറുന്ന ഗ്രഹം. ഭൂമിയില്‍ നിന്നും ശരാശരി 54 കോടി കിലോമീറ്റര്‍ അകലെ. അന്തരീക്ഷത്തില്‍ കാര്‍ബണ്‍ഡൈഓക്‌സൈഡിന്റെ സാന്നിദ്ധ്യം. ഭൂമിയുടെ 1/150 ഉപരിതല മര്‍ദ്ദം. ഒരു ദിവസം (Martian Sol) 24 മണിക്കൂര്‍ 37 മിനിട്ട്. ഒരു വര്‍ഷം 687 ഭൗമദിനം. ഭൂമിയുടെ 1/3 ആകര്‍ഷണശക്തി. 6794 കി.മീ. വ്യാസം, രണ്ടു ചന്ദ്രന്മാര്‍, Deimos, Phobes എന്നിവ. രണ്ടും ചൊവ്വയെ എതിര്‍ദിശയില്‍ വലംവയ്ക്കുന്നു. 15 കി.മീറ്റര്‍ നീളമുള്ള ഡൈമോസ് ചൊവ്വയുടെ 2013 കി.മീ ഉയരത്തില്‍ 30 മണിക്കൂര്‍ കൊണ്ട് പ്രദക്ഷിണം വയ്ക്കുമ്പോള്‍ 27 കി.മി നീളമുള്ള Phobes ചൊവ്വയില്‍ നിന്നും 5973 കി.മി. ഉയരത്തില്‍ 8 മണിക്കൂര്‍ കൊണ്ട് പ്രദക്ഷിണം ചെയ്യുന്നു. ചൊവ്വയുടെ ഒരു ദിവസത്തില്‍ ഇത് രണ്ടുതവണ ഉദിക്കുകയും രണ്ടുതവണ അസ്തമിക്കുകയും ചെയ്യുന്നത് മനോഹരമായ കാഴ്ചയാണ്.

മംഗള്‍യാന്‍ ദൗത്യം ഇപ്പോള്‍തന്നെ വളരെ വിമര്‍ശനങ്ങള്‍ക്ക് ഇടവരുത്തിയിരിക്കുന്നു. 450 കോടി രൂപ മുടക്കി 15 മാസം കൊണ്ട് ധൃതിപിടിച്ച് ഇത്തരം ഒരു സംരംഭത്തിന് തുനിയേണ്ടിയിരുന്നോ? കണക്കുകൂട്ടലുകള്‍ അല്പം ഒന്നു തെറ്റിയാല്‍ എല്ലാം അവതാളത്തിലാകും. ഇന്ത്യക്ക് ശൂന്യാകാശ പര്യവേക്ഷണത്തില്‍ താരതമ്യേന പരിമിതമായ അനുഭവങ്ങളേ ഉള്ളൂ. ഇതൊക്കെ ഇത്ര ദുര്‍ഘടം പിടിച്ച ഗോളാന്തര യാത്രയെ പ്രതികൂലമായി ബാധിക്കില്ലേ? ഇന്നേവരെ നടത്തിയിട്ടുള്ള എല്ലാ ചൊവ്വ പര്യവേക്ഷണങ്ങളിലും പകുതിയോളം വിജയം വരിച്ചിട്ടില്ല. ചൈന, ജപ്പാന്‍ തുടങ്ങിയ രാജ്യങ്ങള്‍ തോറ്റു പിന്മാറിയതാണ്. ഭക്ഷണവും പാര്‍പ്പിടവുമില്ലാതെ പകുതിയോളം ജനങ്ങള്‍ നരകിക്കുമ്പോള്‍ ഇങ്ങനെയൊരു ദൗത്യം ഇപ്പോള്‍ വേണ്ടിയിരുന്നോ? 

ഇതില്‍ നിന്നെല്ലാം വിപരീതമാണ് മറ്റൊരു വിമര്‍ശനം. ISRO ചീഫ് ആയ ഡോ.രാധാകൃഷ്ണന്റെ അമിതമായ ദൈവഭക്തിയാണ് അത്. അദ്ദേഹത്തെ ചീഫ് ആയി നിയമിച്ചുകൊണ്ടുള്ള ഉത്തരവ് അദ്ദേഹം വാങ്ങിയത് ഗുരുവായൂര്‍ അമ്പലത്തില്‍ വച്ചാണ്. കാരണം ഉത്തരവ് വന്നപ്പോള്‍ അദ്ദേഹം അമ്പലത്തില്‍ പൂജയിലായിരുന്നു. മംഗള്‍യാന്‍ ദൗത്യ വിജയത്തിന് അദ്ദേഹം എല്ലാ ദൈവങ്ങളേയും നെഞ്ചത്തടിച്ചു വിളിച്ചു. അതുമാത്രവുമല്ല, ചൊവ്വയുടെ ഒരു രൂപമുണ്ടാക്കി തിരുപ്പതി വെങ്കിടേശ്വര സന്നിധിയില്‍ പ്രതിഷ്ഠിച്ച് നെഞ്ചുരുകി കേണപേക്ഷിച്ചു, ഇതൊന്ന് വിജയിക്കണേയെന്ന്. ഒരു മതേതര രാജ്യമായ ഇന്ത്യയില്‍ ഇത്തരം കോപ്രായങ്ങള്‍ വിരളമല്ലെന്ന് നമുക്കറിയാം. മന്ത്രിമാര്‍ തൊട്ട് ശാസ്ത്രജ്ഞന്മാര്‍ വരെ അമ്പലങ്ങളിലും, പള്ളികളിലും, മോസ്‌കുകളിലും കയറിയിറങ്ങുന്നത് ഒരു അത്ഭുത കാഴ്ചയല്ലല്ലോ. ശാസ്ത്ര രംഗത്ത് അത്യുന്നത പദവിയാണ് കടഞഛയ്ക്ക് ഉള്ളത്. അതിന്റെ മുഖ്യന്‍ തന്നെ തേങ്ങയടിച്ചും ദക്ഷിണയിട്ടും ശാസ്ത്രവിജയത്തിനുവേണ്ടി മുട്ടുകുത്തുന്നത്, മിതമായ ഭാഷയില്‍ പറഞ്ഞാല്‍ അപഹാസ്യമാണ്; ഭരണഘടനാ വിരുദ്ധവും. ഇതൊക്കെ ആരോട് പറയാന്‍? ഇന്ത്യന്‍ ശാസ്ത്രകോണ്‍ഗ്രസ് പോലും ജ്യോത്സ്യന്മാര്‍ക്ക് അവാര്‍ഡുകള്‍ നല്‍കി അഭിനന്ദനങ്ങള്‍ നല്‍കുന്നു. വേദിക് ജ്യോതിഷത്തില്‍ ബിരുദാനന്തര ബിരുദകോഴ്‌സുകള്‍ക്ക് യു.ജി.സി പോലും അംഗീകാരം നല്‍കിയിരിക്കുന്നു! കോടിക്കണക്കിന് രൂപ ഗ്രാന്റും നല്‍കുന്നു. രാഹുകാലം നോക്കി മുഹൂര്‍ത്തങ്ങള്‍ കണ്ടുപിടിച്ച് തേങ്ങയടിച്ച് റോക്കറ്റ് വിക്ഷേപണം നടത്തുന്നവര്‍ ക്രമേണ റോക്കറ്റ് വിക്ഷേപണത്തിന് മാത്രമുള്ള ദൈവത്തെയും കണ്ടുപിടിയ്ക്കും. ഇനി വേദിക് ശൂന്യാകാശ കോഴ്‌സുകള്‍ക്കും അംഗീകാരം നല്‍കും. എന്തൊരു അസംബന്ധമാണ് കാട്ടിക്കൂട്ടുന്നത്! മറ്റൊരു രാജ്യത്തും ഇത്തരം കോപ്രായങ്ങള്‍ അരങ്ങേറുന്നില്ല. ശാസ്ത്ര സാങ്കേതിക രംഗത്ത് അവര്‍ നമ്മേക്കാളുമൊക്കെ എത്രയോ അകലെയാണ്. 24 മണിക്കൂറും ടി വി ചാനലുകള്‍ വഴി പ്രചരിപ്പിക്കുന്ന കെട്ടുകഥകള്‍ കാണുമ്പോള്‍ ഇന്ത്യ വീണ്ടും ഒരു ഭ്രാന്തന്‍ സംസ്‌കാരത്തിലേക്ക് പോകുകയല്ലേയെന്ന് തോന്നിപ്പോകും. ടി വി ചാനല്‍ മത്സരങ്ങളില്‍ വിജയിക്കുന്നവരെല്ലാം ആദ്യം ദൈവത്തിന് നന്ദി പറയുന്നു. തോല്‍ക്കുന്നവര്‍ എന്തു പറയുമെന്ന് ഊഹിക്കാം. അവിടെയെല്ലാം അതിഥിയായിരിക്കുന്ന പുരോഗമനനേതാക്കള്‍ പോലും ഇതിനെതിരെ ഒരക്ഷരം ഉരിയാടാറില്ല. എന്തെങ്കിലും എതിര്‍ത്തു പറഞ്ഞാല്‍ അവരുടെ സ്ഥാനത്തിനോ പ്രശസ്തിക്കോ വല്ല നഷ്ടവും സംഭവിക്കുമോയെന്ന് ഭയന്നാണ്. 

വിമര്‍ശനങ്ങള്‍ക്ക് മറുപടിയായി ഡോ. രാധാകൃഷ്ണന്‍ ഒരു നീണ്ട പ്രസ്താവന പുറപ്പെടുവിച്ചിട്ടുണ്ട്. അതില്‍ അദ്ദേഹം സൗകര്യപൂര്‍വ്വം ക്ഷേത്രദര്‍ശനത്തെയും, തേങ്ങയടിയേയും പറ്റി മിണ്ടുന്നില്ല. യുക്തിവാദിസംഘടനകള്‍ ശക്തമായി തന്നെ ഈ അന്ധവിശ്വാസ പ്രചരണത്തിനെതിരെ രംഗത്തു വന്നിട്ടുണ്ട്. ഫെഡറേഷന്‍ ഓഫ് ഇന്ത്യന്‍ റാഷണലിസ്റ്റ് അസ്സോസിയേഷന്‍ പ്രസിഡന്റ് നരേന്ദ്രനായക് അദ്ദേഹത്തിന്റെ പ്രസ്താവനയില്‍ ഇങ്ങനെ പറയുന്നു, ''ഡോ. രാധാകൃഷ്ണന്‍, അദ്ദേഹത്തിന്റെ വ്യക്തിപരമായ രീതിയില്‍ ക്ഷേത്രത്തില്‍ പോകുന്നതിന് ഒരു തെറ്റുമില്ല. എന്നാല്‍ ISRO യുടെ ചെയര്‍മാനായി സ്വര്‍ഗ്ഗീയ സഹായത്തിനായി പോകുന്നത് അസംബന്ധമാണ്. എല്ലാ പ്രശ്‌നങ്ങള്‍ക്കും ദൈവം പരിഹാരം നല്‍കുമെന്ന ഒരു തെറ്റായ സന്ദേശമാണ് ഇത് സാധാരണ ജനങ്ങള്‍ക്ക് നല്‍കുന്നത്.''

മംഗള്‍യാന്‍ പദ്ധതിക്കെതിരെ രംഗത്ത് വന്നിരിക്കുന്നത് ISRO മുന്‍ ചീഫ് മാധവന്‍ നായരാണ്. ഇത്ര ധൃതിപിടിച്ച് ഇങ്ങനെ ഒരു സംരംഭത്തിന് ഇറങ്ങിപ്പുറപ്പെട്ടതില്‍ യാതൊരു ന്യായീകരണവുമില്ല പോലും! നാസയുടെ ക്യൂരിയോസിറ്റിയെന്ന പരീക്ഷണയന്ത്രം ചൊവ്വയില്‍ നിന്ന് കഴിഞ്ഞ 440-ല്‍ പരം ദിവസങ്ങള്‍കൊണ്ട് ഞെട്ടിപ്പിക്കുന്ന വിവരങ്ങളാണ് നല്കിക്കൊണ്ടിരിക്കുന്നത്. അതിനുപരിയായി ഇനി എന്തുനേടാനാണ്? ചൊവ്വാപര്യവേക്ഷണം നാസ തുടങ്ങിയത് 1976 മുതലാണ്. 1976 ജൂലൈ 20-ന് വൈക്കിംഗ് - 1 ചൊവ്വയുടെ ഉത്തരപ്രദേശത്ത് ഇറങ്ങുകയുണ്ടായി. 4.7.97ല്‍ Path finder ചൊവ്വയില്‍ ഇറങ്ങുകയുണ്ടായി. ഈ രണ്ടു ദൗത്യങ്ങള്‍ വഴി ചൊവ്വയുടെ നിഗൂഢതകള്‍ ധാരാളം വെളിച്ചത്തുകൊണ്ടുവരാന്‍ സാധിച്ചിട്ടുണ്ട്. നാസ 26.11.2011-ല്‍ നിക്ഷേപിച്ച ക്യൂരിയോസിറ്റി 56 കോടി കി.മീ. സഞ്ചരിച്ച് 26.08.2012-ല്‍ ചൊവ്വയുടെ gale crater എന്ന സ്ഥലത്തിറങ്ങി, അവിടെ ഇരുന്നുകൊണ്ട് പല പരീക്ഷണങ്ങളും നടത്തി ധാരാളം വിവരങ്ങള്‍ നല്കിക്കൊണ്ടിരിക്കുന്നു. പ്രഥമ അന്വേഷണം, എപ്പോഴെങ്കിലും ചൊവ്വ ഗ്രഹത്തില്‍ ജീവന്‍ നിലനിന്നിരുന്നോ എന്നതാണ്. അത് കണ്ടെത്താന്‍ വേണ്ടി ചൊവ്വയുടെ പാറക്കഷണങ്ങളും, മണ്ണും പരിശോധിച്ചു വരുന്നു. അതിനുവേണ്ടിയുള്ള Sample Analysis at Mars (SAM) എന്ന ഉപകരണത്തില്‍ ഘടിപ്പിച്ചിരിക്കുന്ന Gas chromato Graph, Mass Spectro Meter, Tunable Laser Spectro Meter എന്നിവയില്‍ കൂടെ ഗവേഷണങ്ങള്‍ നടത്തിക്കൊണ്ടിരിക്കുന്നു. ഏറ്റവും അതിശയിപ്പിക്കുന്ന ആദ്യ റിസല്‍ട്ട്, അവിടത്തെ മണ്ണില്‍ ഉയര്‍ന്ന ശതമാനത്തില്‍ കാണപ്പെട്ട ജലസാന്നിദ്ധ്യമാണ്. ചൊവ്വ പ്രതലത്തിലെ മണ്ണില്‍ 2% ജലത്തിന്റെ അംശവുമുണ്ട്. മണ്ണിന്റെ സാമ്പിളുകള്‍ ചൂടാക്കിയപ്പോള്‍ കാര്‍ബണ്‍ഡൈ ഓക്‌സൈഡ്, ഓക്‌സിജന്‍, സള്‍ഫര്‍ കോമ്പൗണ്ട് എന്നിവ കണ്ടെത്താന്‍ സാധിച്ചു. വെള്ളത്തിന്റെ അംശം കണ്ടെത്തിയപോലെ തന്നെ Minerological Chemical, Geological data എന്നിവയും അന്വേഷണ വിധേയമായി കണ്ടിരിക്കുന്നു. ഏതാണ്ട് 34 ഗവേഷകര്‍ ഇങ്ങ് ഭൂമിയിലിരുന്ന് നിധിപോലെ ലഭിക്കുന്ന വിവരങ്ങള്‍ വിശദമായ പരിശോധനകള്‍ക്കും ഗവേഷണങ്ങള്‍ക്കും പഠനങ്ങള്‍ക്കും വിധേയമാക്കിക്കൊണ്ടിരിക്കുന്നു. ഇവയൊക്കെ ചൊവ്വയുടെ 460 കോടി വര്‍ഷത്തെ പ്രായത്തില്‍ 100 വര്‍ഷം ജലസമൃദ്ധമായിരുന്നുവെന്നും, കടലും, കായലും, നദികളുമൊക്കെ ഉണ്ടായിരുന്നുവെന്നും തെളിയിക്കുന്നതിന് മതിയായ വസ്തുതകളാണ്. ക്യൂരിയോസിറ്റിതന്നെ തറയില്‍ നിന്നും മണല്‍ കോരിയെടുക്കുന്നതും, വെള്ളം കെട്ടിക്കിടന്നിരുന്ന കുണ്ടും കുഴിയും അവിടെ കണ്ട ചരലുമൊക്കെ ദൃശ്യമാകുന്ന, ക്യൂരിയോസിറ്റി പകര്‍ത്തിയ ഫോട്ടോകളും ഇതിനകം ലഭ്യമായിട്ടുള്ളതാണ്. പൊടിപടലങ്ങള്‍, ചെളി, പൊടിച്ചെടുത്ത മണ്ണ് എന്നിവ 1535 ഡിഗ്രി ചൂടാക്കിയപ്പോള്‍ ക്ലോറിന്‍, ഓക്‌സിജന്‍, ക്ലോറേറ്റ്, പെര്‍ക്ലോറേറ്റ് എന്നിവ ചൊവ്വയുടെ ഉത്തരപ്രദേശത്ത് ഉണ്ടെന്ന് കണ്ടെത്തി. ക്യൂരിയോസിറ്റി ഒരിടത്തുമാത്രമിരുന്ന് പരീക്ഷണങ്ങള്‍ നടത്തുന്നതല്ല. ഇതിനകം തന്നെ, ഇറങ്ങിയസ്ഥലത്തു നിന്നും 5.3 മൈലുകള്‍ സഞ്ചരിച്ച് അനേകം സാമ്പിളുകള്‍ ശേഖരിച്ച് പരിശോധിച്ചു കഴിഞ്ഞു. അങ്ങനെ അതിന്റെ അവിരാമമായ ഗവേഷണങ്ങള്‍ നടത്തി പുതിയ വിവരങ്ങള്‍ നല്കിക്കൊണ്ടിരിക്കുന്നു.

ഇപ്പോള്‍ പൊതുവേ ഒരു ധാരണയും സാധാരണയായി ഉയര്‍ന്നു വരുന്നുണ്ട്; മനുഷ്യന് ചൊവ്വയില്‍ ചേക്കേറാമെന്ന്. ഇന്നത്തെ രീതിയില്‍ അത് അപ്രാപ്യമെന്നു പറയാനേ സാധിക്കൂ. കാരണം ചന്ദ്രനില്‍ പോയതുപോലെയല്ലചൊവ്വയില്‍ പോകുന്നത്. ചന്ദ്രനില്‍ നാലു ദിവസം കൊണ്ട് എത്തിച്ചേരാം. ചന്ദ്രനില്‍ നിന്നും ഒരു സെക്കന്റില്‍ ഭൂമിയില്‍ സന്ദേശം ലഭ്യമാകും. എന്നാല്‍ ചൊവ്വ ഭൂമിക്കേറ്റവും അടുത്തുവരുന്ന ശരാശരി ദൂരം 55 കോടി കി.മീ. ആണ്, 780 ദിവസങ്ങള്‍ക്ക് ഒരിക്കല്‍. എന്നാല്‍ അതിനെക്കാളും അടുത്ത് 15-17 വര്‍ഷങ്ങളിലൊരിക്കല്‍ മാത്രമേ വരികയുള്ളൂ. ഒരു സന്ദേശം ചൊവ്വയില്‍ നിന്ന് ഭൂമിയിലെത്താന്‍ 22 മിനിട്ടെങ്കിലും വേണ്ടിവരും. നാസയുടെ ക്യൂരിയോസിറ്റി ചൊവ്വയിലെത്താന്‍ 22255 ദിവസമെടുത്തു. 56.30 കോടി കി.മീ. ദൂരം സഞ്ചരിച്ചു. ഇത്രയും ദൂരം മനുഷ്യന് ശൂന്യാകാശത്തു കൂടി സഞ്ചരിക്കുകയെന്നത് ഇന്നത്തെ അവസ്ഥയില്‍ അസാദ്ധ്യമാണ്. ഇനി ഭാവിയില്‍ എന്തുണ്ടാകുമെന്ന് പ്രവചിക്കുക സാധ്യമല്ല തന്നെ. അതു മാത്രവുമല്ല മനുഷ്യവാസത്തിന് അനുയോജ്യമായ കാലാവസ്ഥയും അവിടില്ല. Space suit ഇല്ലാതെ ചൊവ്വയില്‍ ഇറങ്ങുകയാണെങ്കില്‍ അതികഠിനമായ തണുപ്പുകൊണ്ട് ഉടന്‍ മരിച്ചുപോകും. ജലം സുലഭമായിരുന്ന ചൊവ്വയില്‍ ഏതോ ഉഗ്രന്‍ ഉല്‍ക്ക ഇടിച്ചതുമൂലം വെള്ളവും മറ്റു വസ്തുക്കളും അപ്രത്യക്ഷമായി എന്നാണ് നിഗമനം. 

ശാസ്ത്രഗവേഷണത്തിന് നമ്മുടെ ജീവിത പുരോഗതിയും രാഷ്ട്രവികസനവുമായി അഭേദ്യ ബന്ധമുണ്ട്. പുരാതനശിലായുഗം മുതല്‍ ആധുനിക കാലം വരെയുള്ള മനുഷ്യന്റെ പ്രയാണത്തില്‍ കൈവരിച്ച ഭൗതികവളര്‍ച്ച ശാസ്ത്രനേട്ടങ്ങളുടെ ഫലമാണ്. നമ്മുടെ ശാസ്ത്രജ്ഞന്മാര്‍ നടത്തുന്ന ഏതു പരീക്ഷണങ്ങളും സ്വാഗതാര്‍ഹമാണ്. അന്ധവിശ്വാസങ്ങളിലും ജാതിയിലും മതത്തിലും അഭിരമിച്ചിരിക്കുന്ന നമ്മുടെ സംസ്‌ക്കാരത്തിന് അറുതി ശാസ്ത്ര പുരോഗതി മാത്രമാണ്. അഭൂതമായ ശാസ്ത്ര പുരോഗതിയിലും അന്ധവിശ്വാസങ്ങള്‍ക്ക് പ്രാമുഖ്യം നല്‍കുന്നതില്‍ നിന്നും നമുക്ക് ഒരു കാര്യം അനുമാനിക്കാം; എത്രമാത്രം അഗാധമായി, നമ്മുടെ ശാസ്ത്രജ്ഞന്മാരെപോലും ദൈവിക സങ്കല്പങ്ങള്‍ കീഴടക്കിയിരിക്കുന്നു എന്ന്.

സര്‍വ്വനാശം എന്നത് നാം ഭാവനയില്‍ കൂടെയാണ് കാണുന്നത്. എന്നാല്‍ നമ്മുടെ ഭൂമിയ്ക്കും ഒരു സര്‍വ്വനാശം സംഭവിച്ചിട്ടുണ്ട്. ഭൂമിയ്ക്ക് 460 കോടി വര്‍ഷം പ്രായമുണ്ടെന്നും അത് 900 കോടി വര്‍ഷമാകുമ്പോള്‍ നശിക്കുമെന്നുമാണ് ശാസ്ത്രം. വളരെ കൃത്യമായി ഒരു മണിക്കൂറില്‍ 1700 കി.മീറ്റര്‍ വേഗതയില്‍ സ്വയം കറങ്ങി നമുക്ക് 24 മണിക്കൂര്‍ ദൈര്‍ഘ്യമുള്ള ദിവസങ്ങള്‍ തന്നും, സൂര്യനും ചുറ്റും 1,07,000 കി.മീ. വേഗത്തില്‍ സഞ്ചരിച്ച് 365മ്പ ദിവസം നീണ്ട ഓരോ വര്‍ഷങ്ങള്‍ തന്നും, ജീവജാലങ്ങളും സസ്യങ്ങളും കൊണ്ട് സമ്പല്‍സമൃദ്ധമായി നമ്മെ സംരക്ഷിക്കുന്ന ഭൂമിയ്ക്ക് ഒരു സര്‍വ്വനാശം സംഭവിച്ചു; അത് ഒരു മഹാ കൂട്ടിമുട്ടലിലൂടെ. കൂട്ടിമുട്ടാന്‍ വന്നത് 6 മൈല്‍ നീളമുള്ള ഒരു വലിയ ഉല്ക്ക. കൃത്യമായി പറഞ്ഞാല്‍ 66,03,800 വര്‍ഷങ്ങള്‍ക്കു മുമ്പ്. പ്രപഞ്ചത്തിന്റെ ഏതോ കോണില്‍ നിന്നും പുറന്തള്ളപ്പെട്ട് ഒരു വലിയ പാറക്കഷണം വഴിതെറ്റിയൊ, വഴിതെറ്റാതെയോ നമ്മുടെ ഭൂമിയില്‍ പതിക്കുകയുണ്ടായി. ഇന്നത്തെ തെക്കേ അമേരിക്കയിലെ മെക്‌സിക്കോ എന്ന രാജ്യത്ത് Chicxulub എന്ന സ്ഥലത്ത് 180 കി.മീ. വിസ്തൃതിയുള്ള അഗാധ ഗര്‍ത്തം സൃഷ്ടിച്ചുകൊണ്ടുള്ളതായിരുന്നു ആ കൂട്ടിമുട്ടല്‍. കുറേക്കൂടെ കൃത്യമായി പറഞ്ഞാല്‍, ഭീമാകാരനായ ഡയനോസരസ്സും ആകാശം മുട്ടെ വളര്‍ന്ന് പന്തലിച്ചു നിന്ന മരങ്ങളും അത്യുജ്ജ്വല തീ പ്രളയത്തില്‍ ഭസ്മമായി. അന്തരീക്ഷമര്‍ദ്ദം ഉയര്‍ന്നും, കാട്ടുതീ പടര്‍ന്നും, സുനാമികളുണ്ടായും, ഉരുകിയ പാറമഴകള്‍ ഉണ്ടാക്കിയും സര്‍വ്വനാശം വിതച്ചു. 27000 ഫാരന്‍ഹീറ്റില്‍ ഉയര്‍ന്നചൂടില്‍ ഹിരോഷിമയിലും നാഗസാക്കിയിലും അമേരിക്ക വര്‍ഷിച്ച ആറ്റംബോബിന്റെ നൂറ് കോടി മടങ്ങിലധികം വലിപ്പമുള്ള ന്യൂക്ലിയര്‍ ബോംബിന്റെ ആഘാതമാണ് അവിടെ അരങ്ങേറിയത്. അത് മാത്രവുമല്ല ഭൂമിയുടെ ഉപരിതലത്തില്‍ ഓരോ നാലുമൈല്‍ വ്യത്യാസത്തില്‍ ഈ സ്‌ഫോടനം തുടര്‍ന്നു കൊണ്ടേയിരുന്നു. എന്നാല്‍ നൂറില്‍പ്പരം വര്‍ഷങ്ങള്‍ക്കു മുന്‍പ്, കൃത്യമായിപ്പറഞ്ഞാല്‍ 1908 ജൂണ്‍ 30ന് റഷ്യയിലെ സൈബീരിയയില്‍ ഒരു ഭീമാകാരമായ തീഗോളം പതിക്കുകയുണ്ടായി. 2000 ചതുരശ്ര കിലോമീറ്റര്‍ വിസ്തൃതിയിലുള്ള വനങ്ങളെല്ലാം കത്തിനശിച്ചു. അവിടെ നിന്നും 10,000 കിലോമീറ്റര്‍ അകലെയുള്ള ലണ്ടനില്‍ ഇതിന്റെ പ്രകാശം കാണാന്‍ സാധിച്ചു. ഇക്കഴിഞ്ഞ വര്‍ഷവും സൈബീരിയയില്‍ ഇതുപോലെ ചെറിയ ഒരുല്‍ക്ക വന്നു പതിച്ചത് നാമോര്‍ക്കുമല്ലോ.

നമ്മുടെ ശാസ്ത്രജ്ഞന്മാര്‍ മറ്റൊന്നുകൂടി വെളിപ്പെടുത്തിയിരിക്കുന്നു. ഇതേപോലെ മറ്റൊരു മഹാദുരന്തം 11,000 വര്‍ഷങ്ങള്‍ക്കകം ഉണ്ടാകുമെന്നാണ് പുതിയ കണ്ടെത്തല്‍. എന്തായാലും 11,000 വര്‍ഷങ്ങള്‍ക്കകം മറ്റൊരു ദുരന്തം സംഭവിക്കുമ്പോള്‍ നമ്മളാരും അന്ന് കാണില്ലായെന്ന് നമുക്ക് ആശ്വസിക്കാം. 



പാഞ്ചാലി


സി ഗോവിന്ദന്റെ നോവല്‍ 'പാഞ്ചാലി'. പി കെ ചാത്തന്‍ മാസ്റ്ററുടെ ജീവിതം അന്യാപദേശരൂപത്തില്‍ ആവിഷ്‌കൃതമായിട്ടുണ്ടെന്ന് ചരിത്രകാരനായ ടിഎച്ച്പി ചെന്താരശ്ശേരി അഭിപ്രായപ്പെടുന്നു. പ്രഭാത് ബുക്ക് ഹൗസ് ആണ് പ്രസാധകര്‍.

2018, ഏപ്രിൽ 22, ഞായറാഴ്‌ച

പുസ്തകം: ഭൂമിയുടെ കാവല്‍ക്കാരന്‍ - ഐ ശാന്തകുമാര്‍


ആമുഖം


ദുരാചാരങ്ങളും അന്ധവിശ്വാസങ്ങളും കൊണ്ട് ആള്‍ ദൈവങ്ങളെ ഉണ്ടാക്കി, മനുഷ്യന്റെ ആത്മീയപരിവേഷങ്ങള്‍ക്ക് പുതിയ രൂപഭാവങ്ങള്‍ സൃഷ്ടിച്ച്, ശാസ്ത്രീയ അവബോധ ങ്ങള്‍ക്ക് വൈകൃതങ്ങളുടെ മേലങ്കി അണിയിക്കുന്ന പ്രവണത ഇന്ന് വര്‍ദ്ധിച്ചുവരികയാണ്. ക്രിയാത്മക മാനവികതയ്ക്കു പകരം ഭീകരാത്മക അമാനവികതയ്ക്ക് അത് വളംവെയ്ക്കുന്നു. നമ്മുടെ ജൈവധൈഷണികതയും നൈസര്‍ ഗികതയും അന്വേഷണപരതയും ഉള്‍ക്കൊണ്ട കാലഗമനത്തിന്റെ അനുസ്യൂത പ്രയാണത്തെ മുന്നോട്ടു നയിക്കേണ്ടത് മാനവ ധര്‍മ്മമാണ്. അസത്യങ്ങളുടെ ധൂമകൂപങ്ങളില്‍നിന്നും സത്യത്തെ പ്രകാശപൂരിതമാക്കാനുള്ള എളിയ ശ്രമമാണീ പുസ്തകം.


അതിവേഗം അറിവിന്റെ ചക്രവാളങ്ങളെ കീഴടക്കി മുന്നേറി ക്കൊണ്ടിരിക്കുന്ന നമ്മുടെ ശാസ്ത്രം അതിനൂതന സമസ്യ കള്‍ക്ക് വിധേയമായിക്കൊണ്ടിരിക്കുന്നു. നമ്മുടെ ജിജ്ഞാസ ഗോളാന്തര, നക്ഷത്രാന്തര അതിര്‍വരമ്പുകള്‍ കടന്നുപൊയ് ക്കൊണ്ടിരിക്കുന്നു. അന്യഗ്രഹങ്ങള്‍ (exoplanet) തേടിയുള്ള നീണ്ട യാനങ്ങള്‍ നമ്മുടെ മുന്‍ഗാമികളെയോ പിന്‍ഗാമികളെയോ (aliens) കണ്ടെത്താനുള്ള തത്രപ്പാടിലാണ്. ആ മഹാപ്രയാണ ത്തില്‍ മതത്തിന്റെയും ദുരാചാരങ്ങളുടെയും കപടവിശ്വാസ ങ്ങളുടെയും ചീട്ടുകൊട്ടാരങ്ങള്‍ തകിടം മറിഞ്ഞുകൊണ്ടി രിക്കുന്നു. സൃഷ്ടിയുടെ (Intelligent design) പൈതൃകാവകാശം നേടി അഭൗമ പ്രതിഭാസത്തിന്റെ ഉടമകളെന്ന് അവകാശപ്പെടു ന്നദൈവപുത്രന്മാര്‍ ഭൂമിയുടെയോ പ്രപഞ്ചത്തിന്റെയോ, എന്തിന് അയല്‍പക്കത്തെ രാജ്യത്തെയോ, അവര്‍ ഇരുന്നിരുന്ന മണ്ണിനടിയിലെ നിക്ഷേപത്തെയോപറ്റി പോലും തീര്‍ത്തും അജ്ഞരായിരുന്നു എന്ന സത്യം നമ്മുടെ മുന്നിലുണ്ട്. എന്നിട്ടും അവരെ ഇന്നും മഹനീയമായി നിലനിര്‍ത്തുന്നു! മതത്തെയും വിശ്വാസങ്ങളെയും കച്ചവടവല്‍ക്കരിച്ച് പുതിയ ആഡംബര ആത്മീയ സാമ്രാജ്യങ്ങള്‍ സൃഷ്ടിക്കുന്നു.

അത്ഭുതങ്ങള്‍ സൃഷ്ടിച്ചുകൊണ്ട് ഓരോ ദിവസവും നാം പുത്തനറിവുകള്‍ക്ക് കളം വരച്ചുകൊണ്ടിരിക്കുന്നു. മഹാ വിസ്‌ഫോടനം (Big Bang) എന്ന പ്രപഞ്ചോത്പ ത്തിയുടെ പ്രിമോര്‍ഡിയല്‍ ഗ്രാവിറ്റേഷന്‍ തരംഗങ്ങള്‍ ആയിരക്കണക്കിന് വര്‍ഷങ്ങള്‍ക്കുശേഷം 17-03-2014-ല്‍ ഭൂമിയിലും എത്തിയിരി ക്കുന്നു. അതുവച്ച് കാലഗണനകളും നടത്തിയിരിക്കുന്നു. 

അന്തരിച്ച പ്ലാനിറ്ററി ശാസ്ത്രജ്ഞനായ കാള്‍ സാഗന്‍ 1974-ല്‍ പ്രപഞ്ചരഹസ്യങ്ങള്‍ തേടി ഭൂമിയില്‍ നിന്നും അയച്ച ഒരു സന്ദേശത്തിന് 2001-ല്‍ മറുപടി ലഭിച്ചിരിക്കുന്നു! ഇത് നിസ്സംശയമായും മനുഷ്യചരിത്രത്തിലെ ഒരു നാഴികക്കല്ലാണ്. നമ്മെക്കാളും ബൗദ്ധികവികാസം പ്രാപിച്ച അന്യഗ്രഹ ജീവികളാകാം അതിന്റെ സ്വീകര്‍ത്താക്കള്‍. നമുക്ക് ലഭിച്ച മറുപടിസന്ദേശത്തെ ഡീകോഡ് ചെയ്ത് പ്രപഞ്ചരഹസ്യങ്ങളുടെ ചുരുളഴിക്കാന്‍ ശ്രമിക്കുകയാണ് ശാസ്ത്രലോകം. അത് മറ്ററിവുകളുടെ വിസ്‌ഫോടന കരമായ തുടക്കമായിരിക്കും. ഇരുപത് വര്‍ഷത്തിനകം നാം അന്യഗ്രഹ ജീവികളായ നമ്മുടെ സഹജീവികളെ കണ്ടെത്തുമെന്നാണ് നാസ (NASA) പ്രഖ്യാപിച്ചിരിക്കുന്നത്. മറ്റു ഗോളങ്ങളില്‍ നിന്നും ഭൂമി സന്ദര്‍ശിക്കാന്‍ അന്യഗ്രഹജീവികള്‍ എത്തുന്നു എന്നത് ഒരു വസ്തുതയാണെന്നാണ് പലരും അഭിപ്രായപ്പെടുന്നത്. UFO (Unidentified flying objects) കണ്ടെത്തിയതായി വൈമാനി കരും ബഹിരാകാശ സഞ്ചാരികളും പറയുന്നു. അവര്‍ ഇവിടെ താമസിച്ചിരുന്നതായും വന്‍ നിര്‍മ്മിതികള്‍ നടത്തിയിരുന്നതായും പലരും അഭിപ്രായപ്പെടുന്നു. ഇന്ന് പശ്ചിമേഷ്യയിലും മറ്റുംകാണുന്ന അത്ഭുതകരമായ, ആധുനിക മനുഷ്യനു സങ്കല്പി ക്കാനാവാത്ത കൂറ്റന്‍ കല്‍നിര്‍മിതികള്‍ അവര്‍ നിര്‍മ്മിച്ചിരുന്നു വെന്നാണ് പലരുടെയും നിഗമനം. ലെബനോനിലെ ബാല്‍ബെക് എന്ന പുരാതന ക്ഷേത്രനഗരത്തിലാണ് ലോകത്തിലെ ഏറ്റവും ഭാരമേറിയതും, ഒറ്റക്കല്ലില്‍നിന്നും കൊത്തിയെടുത്തതുമായ കല്‍ത്തൂണ്‍ കാണപ്പെടുന്നത്. 1650 ടണ്ണാണ് ഇതിന്റെ ഭാരം. 

മരണം ശരീരത്തിലേയ്ക്കു പ്രവേശിച്ചിട്ടും അതിന് കീഴടങ്ങാത്ത തലച്ചോറുമായി ജീവിക്കുന്ന ലോകപ്രശസ്ത ശാസ്ത്രജ്ഞന്‍ സ്റ്റീഫന്‍ ഹോക്കിന്‍സ് പറയുന്നു: ''ഗണിത ശാസ്ത്രപരമായ എന്റെ മസ്തിഷ്‌ക്കത്തിലെ അക്കങ്ങള്‍ക്കു മാത്രമേ അന്യഗ്രഹജീവികള്‍ പൂര്‍ണമായും യുക്തിസഹമെന്നു ചിന്തിക്കാന്‍ പറ്റുകയുള്ളു. അന്യഗ്രഹജീവികള്‍ ഭൂമി സന്ദര്‍ശിക്കുകയാണെങ്കില്‍ പലരും പ്രതീക്ഷിക്കുന്നതു പോലെ അതിന്റെ അനന്തരഫലം ഒരിക്കലും നമുക്ക് ഗുണകര മായിരിക്കില്ല. അന്യഗ്രഹജീവികള്‍ നമ്മെ കീഴടക്കിയില്ലെങ്കിലും ഒരു പരിഷ്‌കൃത അന്യജീവിസംസ്‌കാരം നമ്മെ കീഴടക്കി യേക്കാം. അവര്‍ ഭൂമി സന്ദര്‍ശിക്കുകയാണെങ്കില്‍ അതിന്റെ പരിണതഫലം അമേരിക്കയില്‍ കൊളംബസ് കാലുകുത്തി യതുമൂലം അവിടത്തെ റെഡ് ഇന്ത്യന്‍സ് അനുഭവിച്ച ദുരന്തങ്ങള്‍ പോലെയായിരിക്കും.'' ഡോ. കാക്കു എന്ന മറ്റൊരു പ്രശസ്ത ശാസ്ത്രജ്ഞന്‍ പറയുന്നു: ''അന്യഗ്രഹജീവികള്‍ ഭൂമിയില്‍ വരുന്നതിനെയോ നമ്മെ ആക്രമിച്ചു കീഴടക്കുന്നതിനെയോ പറ്റി മനുഷ്യരാശി ചിന്തിക്കാതിരിക്കുന്നതാണ് നല്ലത്. അവര്‍ നമ്മുടെ ചെറുഗ്രഹത്തെ ആക്രമിക്കുകയാണെങ്കില്‍ നമ്മേക്കാളും കോടിക്ക ണക്കിന് വര്‍ഷത്തെ ശാസ്ത്രപുരോഗതി കൈവരിച്ച അവര്‍ക്ക് നമ്മെ നിമിഷങ്ങള്‍ ക്കകം ഭൂമിയില്‍ നിന്ന് നിഷ്‌കാസി തരാക്കാന്‍ സാധിച്ചേക്കും.'' മലയാളികളുടെ അഭിമാനവും തിരുവനന്തപുരം സ്വദേശിയുമായ ഡോ. താണു പത്മനാഭന്‍ പറയുന്നു: ''സൗരയൂഥം നിലകൊള്ളുന്ന ക്ഷീരപഥ നക്ഷത്ര സമൂഹത്തില്‍ തന്നെ ഇരുനൂറോളം ഗ്രഹങ്ങള്‍ ഭൂമി എന്നപോലെ ജീവന്‍ നിലനിര്‍ത്താന്‍ അനുയോജ്യമാണെന്നു കണ്ടെത്തിയിട്ടുണ്ട്. അന്യഗ്രഹജീവികളെക്കുറിച്ചുള്ള അന്വേഷണം വികാസം പ്രാപിച്ചിട്ട് മുപ്പതുകൊല്ലമേ ആകുന്നുള്ളൂ, മനുഷ്യന്‍ പിറന്നിട്ട് സഹസ്രാബ്ദങ്ങള്‍ ആയെങ്കിലും. ഇനി അയ്യായിരം വര്‍ഷം കൂടെ മനുഷ്യന്‍ ഭൂമിയിലുണ്ടാകുമെന്ന് തീര്‍ത്തു പറയാനും വയ്യ''. അദ്ദേഹം തുടരുന്നു: ''പ്രപഞ്ചത്തിന്റെ ഉല്പത്തി ചര്‍ച്ചചെയ്യാന്‍ ദൈവമോ മറ്റുപാധികളോ ആവശ്യമില്ല. വെള്ളംചൂടാക്കിയാല്‍ നീരാവിയാകും. അതിന് ദൈവത്തെ വിളിക്കേണ്ടതില്ല.''

ഇനി കാറല്ല ഓടുന്നത്, മറിച്ച് റോഡായിരിക്കും ഓടുന്നത്. പെട്രോളും വേണ്ടിവരില്ല. പത്തും പതിനെട്ടും മണിക്കൂറുകള്‍ സഞ്ചരിച്ച് മറ്റു രാജ്യങ്ങളിലേക്കുള്ള നീണ്ട യാത്രകള്‍ക്ക് ഇനി മിനിട്ടുകള്‍ മാത്രം മതിയാകും - സ്‌പെയ്‌സില്‍ കയറിയുള്ള യാത്ര.

അത്യത്ഭുതകരമായ ഒരു കാലയളവിലാണ് നാം ജീവിക്കുന്നത്. ആ അത്ഭുതങ്ങളെ കണ്ടെത്തുന്നതോ അന്‍പത് ലക്ഷത്തോളം വരുന്ന ഭൂമിയിലെ മറ്റു ജീവികളില്‍ കൂടെയല്ല; മറിച്ച് ഒരൊറ്റ ജീവിയില്‍കൂടെ മാത്രമാണല്ലോ - ഇടതടവില്ലാതെ ഏഴുലിറ്റര്‍ രക്തം പമ്പു ചെയ്യുന്ന ഒരു ഹൃദയവും ഒന്നരക്കിലോ ഭാരമുള്ള തലച്ചോറുംകൊണ്ട് നിയന്ത്രിച്ച് ഒരു നിമിഷത്തില്‍ പതിനായിരം കെമിക്കല്‍ പ്രതിപ്രവര്‍ത്തനങ്ങളും, ഒരു ദിവസം അന്‍പതിനായിരം ചിന്തകളും കൊണ്ട് സംഭവ ബഹുലമായ ഒരു ജൈവരൂപത്തിന്റെ ഉടമയായ മനുഷ്യനില്‍ കൂടെയാണ്. ഒരളവുകോലു കൊണ്ടും നിര്‍ണയിക്കാന്‍ പറ്റാത്ത പ്രത്യുല്പാദനശേഷിയുള്ള ജൈവവിഭവത്തിന്റെ ഉടമയായ മനുഷ്യന്‍ യഥാര്‍ത്ഥത്തില്‍ നിഗൂഢ ജൈവയന്ത്രം (Enigmatic organic machine) തന്നെ. ആ ഉടലിന്റെ നിഗൂഢതകളെപ്പറ്റിയോ അത്ഭുതങ്ങളെപ്പറ്റിയോ പറയാന്‍ ഒരായിരം നാവുകളാണ്. അതിലൊന്നിനെപ്പറ്റി പറയാം - നമ്മുടെ രണ്ടു കണ്ണുകളും അത്ഭുതങ്ങളാണല്ലോ. അവ രണ്ടും ക്രമപ്പെടുത്തിയിരിക്കുന്നത് 130 മില്യന്‍ (13 കോടി) ഫോട്ടോ റിസപ്റ്റര്‍ സെല്ലുകള്‍ കൊണ്ടാണ്. ആ ഓരോ സെല്ലിലും നൂറ് ട്രില്യണ്‍ അണുക്കള്‍ (ആറ്റം) ഉണ്ടെന്നാണ്. (ഒരു ട്രില്യന്‍ = ഒരു ലക്ഷം കോടി; -അതായത് ഒന്നും പന്ത്രണ്ട് പൂജ്യവും) മൊത്തം 26 x 1021 അണുക്കള്‍ നമ്മുടെ കണ്ണില്‍ പ്രവര്‍ത്തിക്കുന്നു എന്നര്‍ത്ഥം. അതായത് 26 നോട് 21 പൂജ്യം ചേര്‍ക്കുമ്പോഴുണ്ടാവുന്ന സംഖ്യ. അത് നമ്മുടെ ക്ഷീരപഥമെന്ന ഗ്യാലക്‌സിയിലെ എല്ലാ നക്ഷത്രങ്ങളിലുമുള്ള (പതിനായിരം കോടി നക്ഷത്രങ്ങള്‍) അണുക്കളെക്കാളും കൂടുതലാണ്! ഇത് കേള്‍ക്കുമ്പോള്‍ എങ്ങനെ ഞെട്ടാതിരിക്കും. കണക്കുകൂട്ടലുകളുടെ അന്ത്യത്തിന് അതിര്‍വരമ്പുകളില്ലാതാവുന്ന കാഴ്ച! നമുക്കു മുന്‍പില്‍ കാണുന്ന അത്ഭുതങ്ങളേക്കാളും നമ്മിലെ അത്ഭുതങ്ങളി ലേക്കുതന്നെ വീണ്ടും തിരിയാം.

ഇനി നമ്മുടെ ആമാശയം. അതുപോലൊരു പരീക്ഷണ ശാല ലോകത്തൊരിടത്തുമില്ല. ആര്‍ക്കുമുണ്ടാക്കാനും സാധ്യമല്ല. ഇങ്ങനെ അസാധ്യങ്ങളുടെ സാധ്യരൂപമായ ഈ പരിപാവന മായ മനുഷ്യശരീരത്തെ വെട്ടിമുറിച്ചും കുത്തിക്കീറിയും ചുട്ടും കരിച്ചും നശിപ്പിക്കുന്നത് എന്തിനുവേണ്ടി? നമുക്കു സ്വാഭാവി കമായ നാശം ഈ പ്രപഞ്ചത്തില്‍ തന്നെയുണ്ട്. പിന്നെയെന്തിന് നാം സ്വയം നശിക്കണം? ആ പ്രാപഞ്ചിക നാശത്തിനു മുമ്പ് നമുക്ക് മറ്റു ഗ്രഹങ്ങളിലേക്ക് ചേക്കേറാം. അതിനുവേണ്ടി നമുക്ക് ശാസ്ത്രത്തെ പാലൂട്ടി വളര്‍ത്താം.

ഒരു യുക്ത്യാധിഷ്ഠിത, ശാസ്ത്രാധിഷ്ഠിത ലേഖന സമാഹാരമാണീ പുസ്തകം. ഈ അത്യന്താധുനിക ലോകത്ത് ശാസ്ത്രത്തെ മറന്നുകൊണ്ട് മനുഷ്യന് ഒരു നിമിഷം പോലും കഴിഞ്ഞുകൂടാന്‍ സാധ്യമല്ല. ആ ശാസ്ത്രവലയത്തില്‍ നിന്നുകൊണ്ട് എന്റെ സ്മൃതിപഥത്തിലൂടെ കടന്നുപോയ ചില ഫ്‌ളാഷ്ബാക്കുകളാണ് ഇതിലെ വിഷയങ്ങള്‍.

ഇതെന്റെ മൂന്നാമത്തെ പുസ്തകമാണ്. ഇതു പ്രസിദ്ധീകരി ക്കുന്നതിനു വേണ്ടി എന്നോടൊപ്പം പ്രവര്‍ത്തിച്ച ശ്രീ. എല്‍. രാജന്‍, ശ്രീ. ഡി. മോഹന്‍ദാസ്, ശ്രീ. ജി. സിദ്ധാര്‍ത്ഥന്‍ എന്നിവരോട് ഞാന്‍ സര്‍വാത്മനാ കടപ്പെട്ടിരിക്കുന്നു. ഈ പുസ്തകത്തിന്റെ അച്ചടിയ്ക്ക് വേണ്ട എല്ലാ സൗകര്യങ്ങളുംചെയ്തുതന്ന, ഗവ: പ്രസ്സുകളുടെ മുന്‍ സൂപ്രണ്ട് ശ്രീ. മണിലാല്‍ എന്റെ ശാസ്ത്രചിന്തയ്ക്ക് ഒരു മുതല്‍ക്കൂട്ടാണ്. ഞങ്ങളുടെ നീണ്ട ചര്‍ച്ചകള്‍ക്കിടയില്‍ N.R.S. ബാബു എന്ന പ്രതിഭാധനന്‍ ഒളിഞ്ഞും, തെളിഞ്ഞും കടന്നുവരാറുണ്ട്. വീട്ടുജോലി ത്തിരക്കിനിടയിലും സമയം കണ്ടെത്തി, എന്റെ മറ്റു രണ്ടു പുസ്തകങ്ങള്‍ക്കെന്ന പോലെ ഈ പുസ്തകത്തിന്റെ നിര്‍മ്മി തിക്കും കരുത്തേകിയ സഹധര്‍മ്മിണി എസ്സ്. എം. ജയകുമാരി യോടുള്ള സ്‌നേഹാദരങ്ങള്‍ ഊഷ്മളമാണ്. ശാസ്ത്രീയതയ്ക്കു വേണ്ടിയുള്ള ഈ എളിയ സംരംഭം കലുഷിതമായ ഇന്നത്തെ ലോകത്തിലെ വൈരങ്ങള്‍ക്ക് അയവ് വരുത്താന്‍ ഉതകുംവിധം ആരിലെങ്കിലും ഒരു ചലനം സൃഷ്ടിക്കുമെങ്കില്‍ ഞാന്‍ സംതൃപ്തനായി. അത്തരത്തിലുള്ള ഒരു അവബോധം സൃഷ്ടിക്കാനുള്ള ഒരു എളിയ ശ്രമം കൂടിയാണിത്.


ഈ പുസ്തകം പ്രപഞ്ചോല്‍പത്തി മുതല്‍ക്കുള്ള ചരിത്രത്തിന്റെ കാലഗണനകള്‍ കൂടെ വായനക്കാര്‍ക്ക് നല്കുന്നു. 



വിനയപൂര്‍വ്വം,

ഐ. ശാന്തകുമാര്‍
'അഖിലം' 
വഴുതക്കാട്, തിരുവനന്തപുരം
21-03-2017




ഭേദപ്പൊയ്കള്‍



കഥാകൃത്ത് ബിജു രേവമ്മ..!!!! അദ്ദേഹത്തില്‍ നിന്നും വായനക്കാര്‍ക്ക് ലഭിച്ച മികച്ച സൃഷ്ടിയാണ് 'ഭേദപ്പൊയ്കള്‍' എന്ന കഥാസമാഹാരഗ്രന്ഥം. 224 പേജുള്ള ഈ ഗ്രന്ഥം രചയിതാവ് സ്വയം സോഫ്റ്റ് വെയറില്‍ തീര്‍ത്തതാണ്. പഴയ മലയാളലിപിയുടെ ഫോണ്ടാണ് ഉപയോഗിച്ചിട്ടുള്ളത്. പ്രസാധകര്‍ ചെന്നൈയിലുള്ള റീഡിംഗ് ഡെസ്‌കാണ്. വില 150 രൂപ. 'ഭേദപ്പൊയ്കള്‍' എന്നാല്‍ 'രണ്ടുവസ്തുക്കളെ താരതമ്യംചെയ്യുമ്പോഴുണ്ടാകുന്ന ആശയക്കുഴപ്പം' എന്നത്രെ അര്‍ത്ഥം! ബിജു രേവമ്മയുടെ ഫോണ്‍ നമ്പര്‍: 9037674156.



ജെ സി ഡാനിയേല്‍




2018, ഏപ്രിൽ 18, ബുധനാഴ്‌ച

പെരുമാട്ടു കാളി




ഭൂമിയുടെ കാവല്‍ക്കാരന്‍




ഭാഷയുടെ ഉണ്മ




2018, ഏപ്രിൽ 10, ചൊവ്വാഴ്ച

ഹരിജനും ദലിതും - ടി കെ നാരായണന്‍

ടി കെ നാരായണന്‍ 

(1996 ല്‍ ദലിത് വോയ്‌സില്‍ എഴുതിയ ലേഖനം)

1933 ലാണ് ഗാന്ധി ഹരിജന്‍ സേവാസംഘം സാഥാപിച്ചത്. അതിന് തൊട്ടുമുന്‍പോ ശേഷമോ ആണ് 'ഹരിജന്‍ ' എന്ന പദം അദ്ദേഹം തുടങ്ങിയത്. ഏതാണ്ട് ഈ കാലഘട്ടത്തിലാണ് ഹരിജന്‍ എന്ന പേര് അയിത്തജാതിക്കാര്‍ക്ക് അദ്ദേഹം നല്‍കിയതും. 'ഉള്‍വിളി'യെ (innervoice) തന്റെ പ്രവര്‍ത്തനങ്ങള്‍ക്കു വഴികാട്ടിയായി സ്വീകരിച്ചിരുന്ന ഗാന്ധിയുടെ ഉദ്ദേശ്യം എന്തായിരുന്നാലും ആ പേര് അഭിമാന സൂചകമാണെന്നു കരുതാന്‍ നമുക്കു സാധ്യമല്ല. ദയകാണിക്കുന്നത് ഔന്നത്യത്തിന്റെ ലക്ഷണമാണെങ്കില്‍, അത് സ്വീകരിക്കുന്നത് താഴ്മയുടെ ലക്ഷണവുമാണ്. താഴ്ത്തിയവരെ വീണ്ടും താഴ്ത്താനുള്ള പ്രവണത മാഹാത്മ്യത്തിന്റെ ലക്ഷണമല്ല.

ശ്രീകണ്‌ഠേശ്വരം പത്മനാഭപിള്ളയുടെ 'ശബ്ദതാരാവലി'യില്‍ 'ഹരി' എന്ന വാക്കിന്റെ അര്‍ത്ഥം കുതിര, കഴുത (?) കുരങ്ങ് തവള, ഭീരു, വിഷ്ണു, സിംഹം എന്നൊക്കെയാണ്. അതേ നിഘണ്ടുവില്‍ ഹരിജന്‍ എന്നതിന്റെ അര്‍ത്ഥം 'താണജാതിക്കാരന്‍' എന്നുമാണ്. ദാനം കിട്ടിയ പശുവിന്റെ പല്ല് ആരും പിടിച്ചുനോക്കാറില്ലെന്നാണു പറച്ചില്‍. അതിരിക്കട്ടെ ഈ പേരുദാനത്തെക്കുറിച്ചുള്ള ഒരമ്മായിക്കഥ ഇപ്രകാരമാണ്. ഗുജറാത്തി കവിയായ നരസിംഹമേത്തയുടെ ഒരു കവിതയിലെ പ്രധാനകഥാപാത്രത്തിന്റെ പേര് ഹരിജന്‍ എന്നാണുപോലും. ഏതോ അമ്പലത്തില്‍ ജനിച്ച ഒരു കുട്ടിയുടെ അച്ഛന്‍ ആരാണെന്നു കണ്ടുപിടിക്കാന്‍ കഴിയാതെവന്നപ്പോള്‍ അവന്റെ പിതൃത്വം ഹരിയുടെ (ത്രിമൂര്‍ത്തികളില്‍ രണ്ടാമത്തെ ദൈവമായ വിഷ്ണുവിന്റെ മറ്റൊരു പേരാണ് ഹരി) തലയില്‍ കെട്ടിവെച്ചു. ദേവദാസി സമ്പ്രദായം അമ്പലങ്ങളില്‍ തുടങ്ങിയ കാലം മുതല്‍ അവിടെയെല്ലാം 'അച്ഛനില്ലാത്ത' കുഞ്ഞുങ്ങള്‍ പിറക്കുക സര്‍വസാധാരണമായിരുന്നു. അങ്ങനെ മേത്തയുടെ തന്തയില്ലാത്ത കഥാപാത്രം 'ഹരിജ'നായി. അതായത് 'ദൈവത്തിന്റെ മകനാ'യി. ആ അര്‍ത്ഥത്തിലാണ് ഇന്ത്യയിലെ അധ്വാനിക്കുന്ന ജനവിഭാഗമായ അയിത്തജാതിക്കാരെ 'മഹാത്മാ'ഗാന്ധി ഹരിജനങ്ങളെന്നു വിളിച്ചത്. ഇത് ഇന്ത്യന്‍ ചരിത്രത്തിലെ ജാതിനിര്‍മ്മാണപദ്ധതികളില്‍ അവസാനത്തേതാണെന്നു തോന്നുന്നു. കാരണം മഹാത്മാഗാന്ധിയെ പോലെ മറ്റൊരു മഹാത്മാവ് അടുത്തകാലത്തൊന്നും ഇവിടെ ഉടലെടുക്കുമെന്നു തോന്നുന്നില്ല. ഇവിടെ ഒരു കാര്യം ഗാന്ധിഭക്തന്മാരും ജാതിക്കോമരങ്ങളും ധരിക്കുന്നത് നന്നായിരിക്കും. ഇവിടത്തെ 30 കോടിവരുന്ന അധ്വാനിക്കുന്ന അധസ്ഥിത ജനങ്ങള്‍ കുതിരകളോ കഴുതകളോ കുരങ്ങന്മാരോ അല്ല. അവര്‍ 'തന്തയില്ലാത്തവര്‍ ' അല്ല. അധ്വാനിച്ച് മറ്റുള്ളവരെ തീറ്റിപ്പോറ്റുന്ന ജനതയെന്ന നിലക്ക് സ്വന്തം പിതൃത്വത്തില്‍ അവര്‍ക്കാര്‍ക്കും അല്പ്പം പോലും സംശയം ഇല്ല. അതെല്ലാം മേല്‍ജാതിക്കാരായ ആര്യന്മാരുടെ ഇടയില്‍മാത്രം നിലനില്‍ക്കുന്ന സംശയങ്ങളാണ്. ചതിയും വഞ്ചനയും അസന്മാര്‍ഗിക ജീവിതവും എന്തെന്നറിയാതെ, പ്രഭാതം മുതല്‍ പ്രദേഷംവരെ അന്യര്‍ക്കുവേണ്ടി അധ്വാനിച്ച് പട്ടിണിയില്‍ കാലം കഴിക്കുന്ന പച്ചമനുഷ്യരായ സാധാരണക്കാരന് അവരുടെ അച്ഛനമ്മമാര്‍; ദൈവങ്ങേളാ ദൈവസന്താനങ്ങളോ അല്ല. അനങ്ങാനോ മിണ്ടാനോ മറുപടി പറയാനോ കഴിവില്ലാത്ത പാവപ്പെട്ട ദൈവത്തിന്റെ തലയില്‍ അവരുടെ പിതൃത്വം കെട്ടിവെക്കേണ്ടതില്ല. പട്ടികജാതി - പട്ടികവര്‍ഗക്കാര്‍ ഹരിജനങ്ങളല്ല. അതായത് അവര്‍ തന്തയില്ലാത്തവരല്ല; ദൈവത്തിന്റെ സന്തതികളുമല്ല. 

സര്‍ക്കാര്‍ രേഖകളില്‍നിന്നു ഗാന്ധിയുടെ ഹരിജന്‍ നാമം നീക്കാന്‍ നിയമം നിര്‍മ്മിച്ചിട്ടുപോലും ആ പദം പൂര്‍ണമായും ഉപേക്ഷിക്കപ്പെട്ടിട്ടില്ല. മാത്രമല്ല, രാജാവിനേക്കാള്‍ രാജഭക്തിപ്രകടിപ്പിക്കുന്ന കശ്മലന്മാരുടെ മാതൃക പിന്തുടരുന്ന ചില ദലിതലര്‍, ഹരിജന്‍ എന്ന പദം ആഭരണമായിക്കരുതി, വലിച്ചെറിയാന്‍ തയാറാകാതെ ഇപ്പോഴും അമാന്തിച്ചുനില്‍ക്കുന്നു. അന്തസുള്ള ഒരൊറ്റ പട്ടികജാതിക്കാരനും, നിന്ദ്യവും ആക്ഷേപസൂചകവുമായ ഹരിജന്‍ എന്ന പേര് ഉച്ചരിക്കാനോ ഉപയോഗിക്കാനോ പാടില്ല. മനുഷ്യര്‍ ആഹാരംകൊണ്ടുമാത്രമല്ല ജീവിക്കുന്നത്. അന്തസും ആത്മാഭിമാനവും ജീവിതത്തെ പുഷ്‌കലമാക്കുന്ന രണ്ടു ധന്യ സമ്പാദ്യങ്ങളാണ്. അവയുടെ ഉറവിടം അധ്വാനമാണ്. ഹരിജന്‍ എന്ന നിന്ദ്യമായ പേരില്‍ മേലാല്‍ നമ്മളാരും പരിഹാസ്യരാകാന്‍ പാടില്ല.

മറ്റൊന്നുകൂടി; എന്തുകൊണ്ടാണ് ബ്രാഹ്മണനും ക്ഷത്രിയനും വൈശ്യനും ശൂദ്രനും പിന്നോക്കജാതിക്കാരും ഹരിജന്‍ എന്ന പേരില്‍ അറിയപ്പെടാന്‍ ആഗ്രഹിക്കാത്തത്? എന്താ, അവരാരും ദൈവത്തിന്റെ മക്കളല്ലേ? ഇല്ല. കാരണം, അയിത്തജാതിക്കാരെ കബളിപ്പിക്കാനും ഗോപ്യമായി അപഹസിക്കാനും പരസ്യമായി ആക്ഷേപിക്കാനും ഗാന്ധി നല്‍കിയ പേരാണതെന്ന് മേലാളന്മാര്‍ക്കെല്ലാം അറിയാം. ജനനം മുതല്‍ മരണംവരെ വര്‍ണാശ്രമധര്‍മ്മത്തില്‍ തലകുത്തിനിന്ന ഗാന്ധിപോലും ദൈവത്തിന്റെ മകനായി അറിയപ്പെടാന്‍ ഇഷ്ടപ്പെട്ടിരുന്നില്ല. ആരും അദ്ദേഹത്തെ ഹരിജന്‍ ഗാന്ധി എന്നു വിളിച്ചില്ല. ബ്രാഹ്മണ സേവന മണ്ഡലത്തിനു പാരിതോഷികമായി അവര്‍ അദ്ദേഹത്തിനു കനിഞ്ഞരുളിയ 'മഹാത്മാ' എന്ന ഉന്നതമുദ്രയില്‍ അറിയപ്പെടാനാണ് അദ്ദേഹം ഇഷ്ടപ്പെട്ടിരുന്നത്.

പട്ടികജാതി പട്ടികവര്‍ഗക്കാര്‍ 'ദലിത്' എന്നറിയപ്പെടാനാണ് ഇഷ്ടപ്പെടുന്നത്. എന്താണ് ആ പേരിന്റെ അര്‍ത്ഥം, എന്തുകൊണ്ടാണ് അത് ആകര്‍ഷകമായി തോന്നുന്നത്: 'ദാല്‍ ' എന്ന മൂലവാക്കിന്‍ നിന്നാണു 'ദലിത' എന്ന വാക്കുണ്ടായത്. ദാലിന്റെ നാമവിശേഷണമാണ് ദലിത്. പ്രസിദ്ധമായ ഓക്‌സ്‌ഫോര്‍ഡ് സംസ്‌കൃതം ഇംഗ്ലീഷ് നിഘണ്ടുവിന്റെ 471 ആം പേജില്‍ 'ദാല്‍ ' എന്ന വാക്കുണ്ട്. വിശ്വവിഖ്യാത സംസ്‌കൃത പണ്ഡിതന്‍ സര്‍ മോണിയര്‍ വില്യംസ് ആണ് ഈ നിഘണ്ടു തയാറാ ക്കിയത്. (ഈ വാക്ക് മലയാളം ഉള്‍പ്പെടെയുള്ള മിക്ക ഇന്ത്യന്‍ ഭാഷകളിലുമുണ്ട്) ഇതില്‍ ദാല്‍ എന്ന വാക്കിന്റെ അര്‍ത്ഥങ്ങള്‍ burst (പൊട്ടിത്തെറിച്ച), split (വിഭജിക്കപ്പെട്ട, വേര്‍തിരിക്കപ്പെട്ട) scattered (ചിന്നിച്ചിതറിക്കപ്പെട്ട) torn-asunder (പിളര്‍ക്കപ്പെട്ട, അറുത്തുതള്ളപ്പെട്ട) dispersed, crushed (നശിപ്പി ക്കപ്പെട്ട, തകര്‍ക്കപ്പെട്ട) എന്നൊക്കെയാണ്. അയിത്തജാതിക്കാരാക്കപ്പെട്ട ഇന്ത്യയിലെ അധ്വാനിക്കുന്ന ജനങ്ങളുടെ ജീവിതാവസ്ഥയെ പൂര്‍ണമായും വ്യക്തമായും പ്രകടിപ്പിക്കാന്‍ ഉതകുന്ന വാക്കുകളാണിവയെല്ലാം. ഹിന്ദുമതം അതിന്റെ ഉത്ഭവകാലം മുതല്‍ അധസ്ഥിതജനതയെ ജാത്യടിസ്ഥാനത്തില്‍ അടിച്ചമര്‍ത്തി, തകര്‍ത്തുതരി പ്പണമാക്കി, തലപൊക്കാനാവാത്തവണ്ണം ഭിന്നിപ്പിച്ചു നശിപ്പിച്ചിട്ടിരിക്കുകയാണ്. തങ്ങളുടെ വിചാരവും വികാരവുമെല്ലാം തട്ടിയുണര്‍ത്തി വിമോചനത്തിനും വിപ്ലവത്തിനും പ്രചോദനം നല്‍കുന്ന ഈ വാക്കില്‍ അറിയപ്പെടാനാണ് അവര്‍ സ്വാഭാവികമായും ഇഷ്ടപ്പെടുന്നത്. അന്തസും അഭിമാനവും അവര്‍ കണ്ടെത്തുന്നത് ഈ പേരിലാണ്. മാനവരാശിക്ക് ആദ്യമായി പ്രാഗത്ഭ്യം(?) നേടിക്കൊടുത്ത ഹാരപ്പ - മോഹന്‍ജൊദാരോ സംസ്‌കാരത്തിന്റെ പാരമ്പര്യമുള്ള അവര്‍ക്ക്, ആരുടെ മുന്നിലും തലപൊക്കി നില്‍ക്കാന്‍ ധാര്‍മികവും മാനസികവുമായ ധൈര്യമുണ്ട്.

*****

2018, ഏപ്രിൽ 8, ഞായറാഴ്‌ച

2018, ഏപ്രിൽ 5, വ്യാഴാഴ്‌ച

ആരാണ് ഹിന്ദു?




വേലന്‍




ഡോ. അംബേഡ്കര്‍ : മത-രാഷ്ട്രീയ-വിചാരം




വിമോചനപ്പോരാട്ടങ്ങള്‍




രാജര്‍ഷി സാഹുജി മഹാരാജാസ്




2018, ഏപ്രിൽ 4, ബുധനാഴ്‌ച

വി പി സിംഗ്


SC/ST protests: Now Bihar Dalit leader demands 'Harijanistan'; 10 updates

Bharat Bandh, Dalit protests



SC/ST protests: Now Bihar Dalit leader demands 'Harijanistan'; 10 updates: Curfew has been imposed in Madhya Pradesh in the wake of violence witnessed by the state on April 2 during Bharat Bandh

ദലിത് ബിസിനസ് - പി കെ പ്രവീണ്‍




നിര്‍മാണ മേഖല - ശശിക്കുട്ടന്‍ വാകത്താനം




അയോത്തീ ദാസ് - ഡോ. സുരേഷ് മാനെ




കെ രാമകൃഷ്ണപിള്ള സ്വദേശാഭിമാനിയോ?