"Until the lions have their own historians the history of the hunt will always glorify the hunter...."
- Chinua Achebe

2017, നവംബർ 13, തിങ്കളാഴ്‌ച

ജാനകി ബായ്: ഇന്നും മൂക്ക് മുറിക്കല്‍ ശിക്ഷക്ക് വിധേയരാകുന്ന രാവണഭഗിനികമാര്‍...


മധ്യപ്രദേശിലെ സാഗര്‍ ജില്ലയിലെ രെഞ്ജ്വാ ഗ്രാമത്തിലെ ജാതിഹിന്ദുവായ നരേന്ദ്ര സിംഗിന്റെ വയലിലെ അടിമപ്പണിക്കാരാണ് ജാന്‍കി ബായ് ഉം അവരുടെ ആണ്‍തുണയായ രാഘ്വേന്ദ്രയും. പതിവുപോലെ പണിക്കെത്തണമെന്ന് നരേന്ദ്ര സിംഗ് ആജ്ഞാപിച്ചുവെങ്കിലും, അതിമാരകമായ വിഷാംശമുള്ള കീടനാശിനി പ്രയോഗിക്കാന്‍ പ്രയാസമുള്ളതിനാല്‍ ഇരുവരും അന്ന് പണിക്കെത്തിയില്ല. 

ക്ഷുഭിതനായ നരേന്ദ്ര സിംഗും അയാളുടെ അച്ഛന്‍ സാഹേബ് സിംഗും പാഞ്ഞെത്തി രാഘ്വേന്ദ്രയെ തല്ലി അവശനാക്കി. മര്‍ദ്ദനമേറ്റ് വീണ രാഘ്വേന്ദ്രയേയും കൂട്ടി ജാനികി ആശുപത്രിയിലേക്ക് പോകുംവഴി, നരേന്ദ്ര സിംഗും അച്ഛനും വീണ്ടുമെത്തി ഇരുവരേയും മര്‍ദ്ദിച്ചു. അതിനടുത്ത ദിവസം, മധ്യപ്രദേശ് വിമന്‍സ് കമ്മീഷന്‍ മുമ്പാകെ മര്‍ദ്ദനത്തെ സംബന്ധിച്ച പരാതികൊടുക്കുവാനായി പോകുമ്പോള്‍ ജാനകി ബായിയെ തടഞ്ഞു നിര്‍ത്തി നരേന്ദ്ര സിംഗ് ഒരു കൈക്കോടാലി കൊണ്ട് അവരുടെ മൂക്കു മുറിച്ചു...!!! 2017 ആഗസ്റ്റ് 16 നാണ് ജാതിഹിന്ദുക്കളെ കോരിത്തരിപ്പിച്ച ഈ ദലിത് ഹിംസ നാട്ടില്‍ അരങ്ങേറിയത്.

ജാനകി ബായിക്ക് 35 വയസാണ് പ്രായം. മധ്യപ്രദേശ് വിമണ്‍സ് കൗണ്‍സില്‍ ചെയര്‍പേഴ്‌സണ്‍ ലതാ വംഖാഡേ ജാനകി ബായിക്ക് ഏറ്റ മുറിവ് മാരകമാണെന്ന് കണ്ടെത്തി. എന്നാല്‍ പോലീസ്, ഇരുവിഭം ജനങ്ങളുടെ ഇടയില്‍ നാളുകളായി നിലനില്‍ക്കുന്ന സംഘര്‍ഷം മൂര്‍ധന്യത്തിലെത്തിയതുമാത്രമാണ് ഈ സംഭവമെന്ന നിസംഗതയില്‍ കാര്യങ്ങളെ നിസ്സാരവത്കരിച്ചു. പട്ടികജാതി / വര്‍ഗ അതിക്രമ നിരോധനനിയമമുള്‍പ്പെടെ മറ്റെല്ലാ വകുപ്പുകളും ചുമത്തി നരേന്ദ്ര സിംഗിനും അച്ഛനുമെതിരേ കേസുമെടുത്തിട്ടുണ്ട്.

നിയമങ്ങളുടെ കെട്ടുറപ്പുണ്ടായിട്ടും ദലിതര്‍ നേരിടുന്ന അതിക്രമങ്ങള്‍ക്കോ ദലിത് സ്ത്രീകള്‍ ഏല്‍ക്കേണ്ടിവരുന്ന അവമതികള്‍ക്കോ ഒരു കുറവും വന്നുകാണുന്നില്ല. ദലിത് സ്ത്രീത്വം രാമരാജ്യത്തെ ലക്ഷ്ണണന്റെ ഖഡ്ഗപ്രയോഗത്താല്‍ അപമാനിതയായ ശൂര്‍പ്പണഖയുടെ അവസ്ഥയില്‍ നിന്നും ഇതുവരെ വിമോചിതരായിട്ടില്ല. 19 ആം നൂറ്റാണ്ടിലെ കേരളത്തില്‍, നീതികേടിനെതിരേ കിങ്കരന്മാര്‍ക്കുമുന്നിലേക്ക് മുലരിഞ്ഞു നീട്ടിയ നങ്ങേലി മറ്റൊരു സാക്ഷ്യം...!! 

ദലിതന്റെ ജീവന് എന്തു വില? മാരകമായ കീടനാശിനി പ്രയോഗം കൊണ്ട് അവന് ജീവഹാനി സംഭവിച്ചാല്‍ ജാതിഹിന്ദുവിന് എന്തു ചേതം? അവന്റെ പശുവിന് ഒരു പോറല്‍ പോലും പറ്റരുതേ... കീടനാശിനിയുടെ ഗുണനിലവാര പരിശോധന ക്കായാണല്ലോ ദലിത് ഉടലുകള്‍ സൃഷ്ടിക്കപ്പെട്ടിട്ടുള്ളത്. കീടനാശിനി പ്രയോഗം ദലിത് ഉടലുകളെ ദോഷകരമായി ബാധിക്കുന്നു എന്ന് ബോധ്യപ്പെട്ടാല്‍, പിന്നെ ജാതിഹിന്ദു അവന്റെ പശുവിനെക്കൊണ്ട് ആ വിള തീറ്റിക്കുകയില്ല! ഇതാണ് പരീക്ഷണം....!

huffingtonpost.in
mid-day.com
ndtv.com


അഭിപ്രായങ്ങളൊന്നുമില്ല:

ഒരു അഭിപ്രായം പോസ്റ്റ് ചെയ്യൂ