"Until the lions have their own historians the history of the hunt will always glorify the hunter...."
- Chinua Achebe

2017, നവംബർ 16, വ്യാഴാഴ്‌ച

പ്രകാശ്: കഴുത്തറുക്കപ്പെട്ട ഏകലവ്യന്‍..!!!

image link;



ഒരു പ്രതിഭയെക്കൂടി കൊന്നെടുത്തിരിക്കുന്നു. ചെന്നൈയിലെ ഗവണ്മെന്റ് ഫൈന്‍ ആര്‍ട്ട്‌സ് കോളേജില്‍ സിറാമിക് ഡിസൈന്‍ കോഴ്‌സിന് പഠിക്കുകയായിരുന്ന പ്രകാശ് എന്ന ദലിത് വിദ്യാര്‍ത്ഥി വെല്ലൂരുള്ള വസതിയില്‍ 2017 ഒക്ടോബര്‍ 25 ന് കെട്ടിത്തൂ ങ്ങി ആത്മഹത്യ ചെയ്ത വാര്‍ത്ത 'ദി ഹിന്ദു' വെബ് പത്രിക റിപ്പോര്‍ട്ട് ചെയ്തു.

പാര്‍ത്ഥിബനും സെന്താമരൈയുമാണ് പ്രകാശിന്റെ അച്ഛനമ്മമാര്‍. പാര്‍ത്ഥിപന്‍ ഗവ. ആശുപത്രിയില്‍ ജീവനക്കാരനാണ്. തങ്ങള്‍ക്കുള്ളതെല്ലാം വിറ്റുപെറുക്കിയാണ്, അച്ഛനമ്മമാര്‍ പ്രകാശിന്റെ പഠനച്ചെലവിനുള്ള തുക കണ്ടെത്തിയത്. അതോടെ കുടുംബം ഭവനരഹിതരായി. ഹോസ്റ്റലില്‍ താമസിച്ച് പഠിക്കുന്നതിനുവേണ്ട അധി കച്ചെലവ് കണ്ടെത്താന്‍ പ്രയാസമായതിനാല്‍ പ്രകാശ് വെല്ലൂരുള്ള വസതിയില്‍ നിന്നും കോളേജില്‍ വന്നുപോയാണ് പഠനം തുടര്‍ന്നിരുന്നത്. കുട്ടിയായിരിക്കു മ്പോള്‍ത്തന്നെ പ്രകാശ്, ചിത്രരചനയിലും പെയിന്റിഗിലും അസാധാരണ വൈഭവം പ്രകടിപ്പിച്ചിരുന്നു. കാള്‍ സാഗന് തുല്യനായ ഒരു ശാസ്ത്രസാഹിത്യകാരനായി ഉയരണമെന്ന് ആഗ്രഹിച്ചിരുന്ന രോഹിത് വെമുലയെ പോലെ ചിത്രകലയിലെ ചരിത്രപുരുഷന്മാരുടെ ഇടയിലേക്ക് വളര്‍ന്ന് വലുതാകണമെന്ന മോഹം പ്രകാശും വെച്ചുപുലര്‍ത്തിയിരുന്നു.

കോളേജില്‍ നിന്നും സമര്‍ത്ഥനായ വിദ്യാര്‍ത്ഥിക്കുള്ള അവാര്‍ഡ് രണ്ടുതവണ പ്രകാശ് കരസ്ഥമാക്കിയിട്ടുണ്ട്. സമ്പൂര്‍ണ മികവിനുള്ള അവാര്‍ഡിന് പ്രകാശിനെ പരിഗണി ക്കപ്പെട്ടത് പക്ഷെ, ഫാക്കല്‍റ്റിയിലുള്ള അധ്യാപകരില്‍ ദുരയുളവാക്കി. എല്ലാം തികഞ്ഞവര്‍ എന്ന അഹങ്കാരം വെച്ചുപുലര്‍ത്തിയിരുന്ന ഉയര്‍ന്ന ജാതിക്കാരനായ അധ്യാപകരുടെ കാഴ്ചപ്പാടില്‍ ഹീനജാതിക്കാരന്‍ കഴിവുകെട്ടവനായിരുന്നു. അധ്യാപ കരുടെ ഈ മുന്‍വിധിയെയാണ് രണ്ടുവര്‍ഷത്തെ മികവിനുള്ള അംഗീകാരം നേടിടെ യുത്തതിലൂടെ പ്രകാശ് ഉച്ചാടനം ചെയ്തത്. അതിന് അവര്‍ പകരംവീട്ടിയത്, മറ്റ് വിദ്യാര്‍ത്ഥികളുടെ മുമ്പില്‍വെച്ച് പ്രകാശിനെ ജാതിപ്പേര് വിളിച്ച് അധിക്ഷേപിച്ചു കൊണ്ടായിരുന്നു. 

എല്ലാം തികഞ്ഞവരും, ലോകത്തെ മറ്റെല്ലാ ജനവിഭാഗങ്ങളേയും അടക്കിഭരിക്കാന്‍ അധികാരപ്പെട്ടവര്‍ എന്ന അഹങ്കാരം വെച്ചുപുലര്‍ത്തിയ, സ്വേച്ഛാധിപതിയായിരുന്ന അഡോള്‍ഫ് ഹിറ്റ്‌ലര്‍, ബെര്‍ലില്‍ ഒളിമ്പിക്‌സില്‍ 4 മെഡല്‍ നേടിയെ കറുത്തവര്‍ഗ ക്കാരന്‍ ജെസ്സി ഓവന്‍സിനെ കണ്ട്് കലികയറി സ്‌റ്റേഡിയം വിട്ടുപോയ സംഭവത്തിന് ചരിത്രം സാക്ഷി! ഈ സുപ്രീമസി പോളിസിയാണ് പ്രകാശിന്റെ ജീവന്‍ അപഹരിച്ചത്. ആറുമാസങ്ങള്‍ക്കു മുമ്പ് അധ്യാപകര്‍ തന്നെ അധിക്ഷേപിക്കുന്നതായി പ്രകാശ് അമ്മയെ അറിയിച്ചിരുന്നു. കുടുംബത്തിന് ആ അറിവ് വലിയ ആഘാതമാ യിരുന്നു. കാരണം മിടുക്കനായ വിദ്യാര്‍ത്ഥിക്കുള്ള അവാര്‍ഡിന് രണ്ടുവട്ടം തെരഞ്ഞെ ടുക്കപ്പെട്ട ഒരാള്‍ അധ്യാപകരാല്‍ അധിക്ഷേപിക്കപ്പെടുകയോ? അമ്മ സെന്താ മരൈ പത്രലേഖകര്‍ക്കു മുന്നില്‍ വിതുമ്പി.... 

പ്രകാശ് കൊല്ലപ്പെട്ടശേഷം ആഴ്ചകള്‍ പിന്നിട്ടിട്ടും പൊലീസിന്റെ ഭാഗത്തുനിന്ന് വളരെ നിസ്സംഗമായ സമീപനമാണ് ലഭിക്കുന്നതെന്ന് പ്രശ്‌നത്തില്‍ ഇടപെട്ട സന്നദ്ധസംഘടനയായ 'എവിഡന്‍സ്'ന്റെ വക്താവായ എ കതിര്‍ പത്രലേഖകര്‍ക്കു വെളിപ്പെടുത്തി. എവിഡന്‍സ് മാത്രമാണ് ഈ കാര്യത്തില്‍ സമാശ്വാസത്തിനായി പാര്‍ത്ഥിബന്റേയും സെന്താമരൈയുടേയും കൂടെയുള്ളത്.

ഇവിടെ ഉയര്‍ന്നുവരുന്ന ചോദ്യമിതാണ്, കഴിവുണ്ടെന്ന് ബോധ്യപ്പെട്ടതുകൊണ്ടാ ണല്ലോ പ്രകാശിനെ രണ്ടുവട്ടം മികച്ച വിദ്യാര്‍ത്ഥിക്കുള്ള അവാര്‍ഡിനായി അധ്യാപകര്‍ തെരഞ്ഞെടുത്തത്. അയാള്‍ ഇപ്പോള്‍ ഇല്ലായ്മചെയ്യപ്പെട്ടിരിക്കുന്നു. ശേഷിക്കുന്നത് കഴിവ് കുറഞ്ഞവര്‍ മാത്രം. ഈ കഴിവുകുറഞ്ഞവരെക്കൊണ്ടാണോ ജാതിഹിന്ദുക്കള്‍ രാജ്യത്തെ പുരോഗതിയിലെത്തിക്കാന്‍ ശ്രമിക്കുന്നത്? 

ഏകലവ്യനെ നിര്‍വീര്യനാക്കിക്കൊണ്ടല്ല അരുമശിഷ്യനെ ഒന്നാം സ്ഥാനത്ത് എത്തിക്കേണ്ടത്. ഏകലവ്യന്‍ ആര്‍ജിച്ചതിനേക്കാള്‍ ഉപരിയായ ശേഷികള്‍ ശിഷ്യന് (അര്‍ജുനന്) പകര്‍ന്നുകൊടുക്കണമായിരുന്നു. അതായിരിക്കണം ഒരു ഗുരുവിന്റെ ധര്‍മം. ഇവിടെ ദ്രോണാചാര്യര്‍ പ്രവര്‍ത്തിച്ചത് ധര്‍മത്തിന് വിരുദ്ധമാണ്. 




അഭിപ്രായങ്ങളൊന്നുമില്ല:

ഒരു അഭിപ്രായം പോസ്റ്റ് ചെയ്യൂ