"Until the lions have their own historians the history of the hunt will always glorify the hunter...."
- Chinua Achebe

2017, ഒക്‌ടോബർ 27, വെള്ളിയാഴ്‌ച

പാമ്പാടി എന്‍. ജോണ്‍ ജോസഫ് - പെരുമ്പാവൂര്‍ രാധാകൃഷ്ണന്‍



ജനനം : 1887. വിദ്യാഭ്യാസം : ഏഴാം ക്ലാസ്സ്. ഏഴാം ക്ലാസ്സ് വിദ്യാഭ്യാസം അക്കാലത്തെ ഉന്നത വിദ്യാഭ്യാസ യോഗ്യയതയായി കണക്കാക്കപ്പെട്ടിരുന്നതിനാല്‍ അദ്ധ്യാപക ജോലി കിട്ടുന്നതിന് എളുപ്പമായി. കോട്ടയം ജില്ലയിലെ പാമ്പാടിയില്‍ മിഷന്‍ സ്‌കൂളില്‍ അദ്ധ്യാപകനായി ജോലി കിട്ടി. 58 ചക്രം (രണ്ട് സര്‍ക്കാര്‍ രൂപ) വേതനമായി കിട്ടിയിരുന്നത് ഒന്നിനും തികയാത്ത അവസ്ഥയില്‍ പെരുമ്പെട്ടി വനമേഖലയില്‍ തൊഴിലാളികളെ എത്തിച്ചുകൊടുക്കുന്ന ജോലി ഏറ്റെടുത്തു. നല്ല തുക ശമ്പളമായി ലഭിക്കുമെന്നുള്ള അറിവ് 1914-ല്‍ പട്ടാളത്തില്‍ ചേരുന്നതിന് കാരണമായിത്തീര്‍ന്നു. പട്ടാളത്തിലെ ജോലിക്കിടയില്‍ നിരവധി രാജ്യങ്ങള്‍ സന്ദര്‍ശിക്കുന്നതിനും അവിടത്തെ ജനങ്ങളുടെ ജീവിതരീതി പഠിച്ച് മനസ്സിലാക്കുന്നതിനും അദ്ദേഹത്തിന് കഴിഞ്ഞു. യുദ്ധ സമയത്തെ നേര്‍ കാഴ്ചകള്‍ വല്ലാത്ത അനുഭവമായി മാറി. പട്ടാള ജോലി അവസാനിപ്പിച്ച് നാട്ടില്‍ എത്തിയത് ഒരു പുതിയ മനുഷ്യനായിട്ടാണ്. മിഷനറി പ്രവര്‍ത്തനത്തിലൂടെ മറ്റൊരു പ്രവര്‍ത്തനമേഖല തുറന്നു. മിഷനറി പ്രവര്‍ത്തന കാലത്ത് സുഖസമൃദ്ധമായി കഴിയാനുള്ള എല്ലാ ചുറ്റുപാടുകളും സായ്പ്പുമാര്‍ ഒരിക്കികൊടുത്തു. ജര്‍മ്മിനിക്കാരായ മിഷനറിമാര്‍ക്ക് ഇന്ത്യവിട്ടുപോകേണ്ടി വന്നപ്പോഴും തുടര്‍ന്നും സാമ്പത്തിക സഹായം അദ്ദേഹത്തിന് അവര്‍ നല്‍കികൊണ്ടിരുന്നു. 1930 വരെ ആ നിലയ്ക്കുള്ള സാമ്പത്തിക സഹായം ലഭിച്ചുകൊണ്ടിരുന്നു. ഈ സൗകര്യം ഉപയോഗിച്ച് എല്ലായിടത്തും ചുറ്റി സഞ്ചരിക്കുന്നതിനുംആളുകളെ പരിചയപ്പെടുന്നതിനുമുള്ള അവസരം ഭംഗിയായി വിനിയോഗിച്ചു. അങ്ങനെ ഒരവസരത്തില്‍ വെണ്ണികുളം നാരകത്താനത്ത് അഞ്ചാനിയില്‍ ഐസക്ക് ആശാന്റെ മകള്‍ സാറയെ പരിചയപ്പെടുകയും വീട്ടുകാരുടെ എതിര്‍പ്പോടെ അവരെ വിവാഹം കഴിക്കുകയും ചെയ്തു. കുഞ്ഞിപ്പായി എന്ന മകളുടെ ജനനത്തോടെ 1916-ല്‍ ജോണ്‍ ജോസഫ് സ്വന്തം വീടും നാടും ഉപേക്ഷിച്ച് എങ്ങോട്ടേയ്‌ക്കോ പോയി. നീണ്ട അഞ്ചു വര്‍ഷങ്ങള്‍ക്കു ശേഷം വീണ്ടും ഒരു പുതിയ മനുഷ്യനായി ജോണ്‍ ജോസഫ് മടങ്ങിയെത്തി. തന്റെ അഞ്ച് വര്‍ഷത്തെ ഒളിജീവിതം താരതമ്യപ്പെടുത്തേണ്ടത് തന്റെ കുഞ്ഞിനെയും ഭാര്യയേയും ഉപേക്ഷിച്ച് പോയിട്ട് അഞ്ച് വര്‍ഷത്തിനുശേഷം മടങ്ങിവന്ന ഗൗതമിനോടാണ്. മടങ്ങി വന്ന ജോണ്‍ ജോസഫ് സ്വന്തം സമൂഹത്തിന്റെ ദുഃസ്ഥിതിയെപ്പറ്റി ചിന്തിച്ച് വ്യാകുലനായി കാണപ്പെട്ടു. പരിതാപകരമായ അവസ്ഥയില്‍ നിന്നും സ്വന്തം ജനത്തെ രക്ഷിക്കാനുള്ള മാര്‍ഗ്ഗത്തെപ്പറ്റി അദ്ദേഹം കൂലങ്കഷമായി ചിന്തിച്ചു തുടങ്ങി. ഒടുവില്‍ ആ തീരുമാനത്തില്‍ അദ്ദേഹം എത്തിചേര്‍ന്നു-സ്വന്തം സമൂഹത്തിന്റെ നന്മയ്ക്കായി പ്രവര്‍ത്തിക്കണം. കൊല്ലത്തേക്ക് താമസംമാറ്റിക്കൊണ്ട് തന്റെ പ്രവര്‍ത്തനമേഖല യില്‍ ജോണ്‍ ജോസഫ് ഇറങ്ങിപുറപ്പെട്ടു. കീഴ്ജാതിക്കാര്‍ തിങ്ങിപ്പാര്‍ക്കുന്ന പ്രദേശം എന്ന പ്രത്യേകത കൊല്ലത്തിനുണ്ട്. മാത്രമല്ല കീഴ്ജാതിക്കാരുടെ അസമത്വം അവസാനിപ്പിക്കുവാന്‍ മഹാത്മ അയ്യങ്കാളി നേതൃത്വം നല്കി നടത്തിയ സഞ്ചാര സ്വാതന്ത്യസമരം, വിദ്യാഭ്യാസം ചെയ്യാനുള്ള അവകാശസമരം പെരിനാട് ലഹള എന്നിവയുടെ അലയൊലികള്‍ അപ്പോഴും അവസാനിച്ചിരുന്നില്ല. കൊല്ലത്തെ തന്റെ താമസം അവസാനിപ്പിച്ച് അദ്ദേഹം തിരുവനന്തപുരത്തിന് പോയി. അങ്ങനെയാണ് മഹാത്മ അയ്യങ്കാളിയുമായി നേരില്‍ ബന്ധപ്പെട്ട്. പ്രവര്‍ത്തനങ്ങള്‍ മനസ്സിലാക്കുന്നതിന് കഴിഞ്ഞത്. അതോടൊപ്പം നിരവധി മറ്റ് നേതാക്കളെയും പ്രഗത്ഭരേയും കണ്ട് പരിചയപ്പെടുന്നതിനുള്ള അവസരം അദ്ദേഹത്തിന് ലഭിച്ചു.

അയിത്തവും അടിമത്തവും മൂലം കഷ്ടപ്പെടുന്ന തന്റെ ജനതയുടെ മോചനത്തിന് ഉപജാതി മതചിന്തകള്‍തീതമായി ഒരു പ്രസ്ഥാനം കെട്ടിപ്പടുക്കുവാനുള്ള അദ്ദേഹത്തിന്റെ ശ്രമങ്ങള്‍ക്ക് തുടക്കത്തിലേ എതിര്‍പ്പുകള്‍ നേരിടേണ്ടിവന്നു. ഹിന്ദുക്കളും ക്രിസ്ത്യാനികളും വെേവ്വറെ സംഘടിച്ച്ദലിത് സമൂത്തിന്റെ സംഘടിതശക്തി ചോര്‍ത്തിക്കളഞ്ഞു. ജോണ്‍ ജോസഫ് തന്റെ പ്രവര്‍ത്തനത്തില്‍ തളരാതെ മുന്നോട്ട് പൊയ്‌ക്കൊണ്ടിരുന്നു. ഈ കാലയളവില്‍ ചേരമന്‍ ദൂതന്‍ പ്രസ്സ്സ്ഥാപിച്ചു. പുസ്തക രചനയും നടത്തി. എടുത്തു പറയേണ്ട ഒരു സംഭവമാണ് 1925 ഡിസംബറില്‍ കോട്ടയം പട്ടണത്തില്‍ നടത്തിയ സഞ്ചാര സ്വാതന്ത്യ സമരജാഥ തിരുവനന്തപുരത്ത് എത്തി. അയ്യങ്കാളി നേതാവുമായി നേരില്‍ ബന്ധപ്പെട്ട് പ്രവര്‍ത്തിക്കുന്നതിന് കഴിഞ്ഞത് തന്റെ ജീവിതത്തിലെ വിലമതിക്കപ്പെട്ട ഒരു ഏടാണ് എന്ന് പറയാം. അയ്യങ്കാളിയുടെ ഇടപെടല്‍ കൂടുതല്‍ കീഴ്ജാതിക്കാര്‍ പ്രജാസഭയില്‍ മെമ്പര്‍മാരായി തീരുന്നതിന് ഇടയാക്കി. പാമ്പാടി എന്‍.ജോണ്‍ ജോസഫ് ശ്രീമൂലം പ്രജാസഭയില്‍ 1931 ജൂണ്‍ 8-ന് അംഗമായി ശുപാര്‍ശ ചെയ്യപ്പെട്ടു. തന്റെ സ്വന്തം ജനതയുടെ കാലുവാരല്‍നയം അദ്ദേഹത്തിന്റെ ജീവനുതന്നെ ഭീക്ഷണിയായിത്തീര്‍ന്നു. സംഭവബഹുലമായ ആ ജീവിതം 1115 കര്‍ക്കിടം 3-ന് അവസാനിച്ചു.

പെരുമ്പാവൂര്‍ രാധാകൃഷ്ണന്‍ 









അഭിപ്രായങ്ങളൊന്നുമില്ല:

ഒരു അഭിപ്രായം പോസ്റ്റ് ചെയ്യൂ